Социјалната мрежа Threads достигна 275 милиони активни корисници месечно, објави извршниот директор на Meta за Threads и Instagram, Адам Мосери. „Голема благодарност до сите што ни помогнаа да стигнеме досега“, изјави Мосери, пренесува TechCrunch.

Threads беше лансиран во јули 2023 година, со цел да привлече милиони корисници кои се откажаа од социјалната мрежа X откако таа беше преземена од најбогатиот човек на светот, Илон Маск. Од почетокот, Threads покажа брз раст – во април достигна 150 милиони корисници, кој се зголеми на 200 милиони во август, а сега бројот на месечно активни корисници се искачи на 275 милиони.

Ова значи дека Threads добил дополнителни 75 милиони активни корисници само за три месеци, сигнализирајќи сериозен потенцијал за конкуренција на X. Минатата недела, извршниот директор на Meta, Марк Закерберг, исто така објави дека околу еден милион корисници го користат Threads секој ден.

Се појавуваат нови гласини дека Samsung планира да лансира поприфатлив преклоплив телефон од серијата Z, но овој пат, најверојатно нема да биде модел од Z Fold линијата. Наместо тоа, се очекува дека јужнокорејскиот гигант ќе го претстави моделот Z Flip FE како својот поевтин преклоплив уред.

Плановите покажуваат дека Samsung Z Flip FE би можел да биде претставен заедно со новиот Galaxy S25 Slim, со премиера закажана во април следната година. Иако сè уште нема многу детали за спецификациите и цените на Z Flip FE, се споменува можноста за најава и на моделот Galaxy Z Fold7, што навестува дека Flip7 и Fold7 може повторно да бидат лансирани заедно, како што обично прави Samsung со сериите Fold и Flip.

Гласините дополнително откриваат дека Samsung размислува за лансирање на два модела Fold следната година. Останува нејасно дали еден од нив ќе биде со пониска цена и ќе ја носи ознаката FE, или пак Samsung ќе продолжи со својата премиум понуда во оваа категорија.

Најреалното сценарио изгледа да биде стандардниот Galaxy Z Fold7 да пристигне како наследник на Z Fold6, додека новата верзија – Z Fold Special Edition, ќе понуди неколку ексклузивни функции за корисниците на овој сегмент.

Едно неодамнешно истражување од Универзитетот во Канзас открива дека ChatGPT добива сè поголема доверба кај родителите кога станува збор за здравјето на нивните деца. Од 116 родители кои учествувале, многумина изјавиле дека не можеле да направат разлика помеѓу содржини генерирани од ChatGPT и совети напишани од медицински експерти, притоа често оценувајќи ги советите од чет-ботот како веродостојни и точни.

Истражувањето, кое било започнато кратко по лансирањето на ChatGPT, се фокусирало на тоа како родителите ги користат ваквите алатки за брз пристап до здравствени информации. Испитаниците добиле здравствени текстови – дел од ChatGPT и дел од доктори – без да знаат кој е авторот. Оценувајќи ги според кредибилитет, точност и експертиза, голем дел од нив ја нагласиле довербата во AI-советите, при што некои изјавиле дека чет-ботовите се „покорисни“ од традиционалните медицински извори.

Калиса Лесли-Милер, истражувач вклучена во студијата, изрази загриженост за овој тренд, објаснувајќи дека AI алатките често создаваат „халуцинирани“ одговори – измислуваат факти или детали кои не се точни. Ова особено е ризично кога станува збор за здравјето на децата, предупредува таа, бидејќи може да доведе до несакани последици. Таа повикува на внимателност и додава дека родителите треба да се консултираат со експерти, особено за чувствителни здравствени информации, без да се потпираат само на дигитални совети.