Спорт

Една година од Супер купот во Скопје

На денешен ден пред една година, Фудбалската федерација на Македонија и УЕФА го организираа Супер купот меѓу великаните на светскиот фудбал, Реал Мадрид и Манчестер Јунајтед.

– Скопје беше домаќин на најголемиот натпревар во историјата на нашата држава. На Националната Арена „Филип Втори“ дојдоа светските ѕвезди предводени од најдобриот во светот, Кристијано Роналдо, актуелните светските шампиони Погба и Варан, најдобриот од последниот мундијал Лука Модриќ и уште многу други фудбалски супер ѕвезди како Иско, Тони Крос, Бејл, Серхио Рамос, Лукаку, Матиќ… потсетуваат од ФФМ.

Официјални гости на најголемиот фудбалски настан што се одржал во македонската престолнина беа и легендарните Сер Алекс Фергусон, Сер Боби Чарлтон, Раул, Емилио Бутрагењо, Звонимир Бобан, Марко Ван Бастен, како и највисоките претставници на УЕФА и ФИФА предводени од претседателите Александар Чеферин и Џани Инфантино.

Натпреварот го проследија навивачите од цела Европа, а на крајот Реал Мадрид победи со 2:1.

По фудбалскиот спектакл, УЕФА се заблагодари за прекрасната организација, оценувајќи го настанот како „Најдобар во историјата на Супер куп натпреварувањето“.

Close