Случувања Спорт

Хамилтон откри низ каква драма поминал во Бразил (ФОТО)

Луис Хамилтон ја освои петтата титула за време на трката за Големата награда на Мексико, но бидејќи на таа трка беше четврти, прославата ја направи во Бразил кога по многу перипетии успеа да стигне до првото место.

Најпрвин тој ја поведе трката, но беше престигнат од Ферстапен, за откако возачот на Ред Бул да биде удрен од Естебан Окон, тој да се врати на лидерското место и да го доведе сребрениот болид до целта како првопласиран, иако имал проблеми со моторот.

– Преку радио врската слушнав дека моторот ќе има дефект во следниот круг. Кога тоа не се случи побарав од инженерите да најдат решение. Потоа ми кажаа дека има проблем со издувот. Температурите беа неприфатливо високи,- откри Хамилтон. – Навистина чувствував благодарност што моторот ги издржа последните 10 круга. Врескав во болидот „ајде срцка, ти можеш. Да останеме заедно“, не можете да замислите колку е лудо чувството додека имате срцебиење со 190 отчукувања, а се обидувате да го одржите болидот кој има проблеми. На крајот се чувствував пресреќен и благодарен,- рече Луис.

Без неговите 25 бода за победатаМерцедес немаше да ја освои конструкторската титула на оваа трка и тоа прашање ќе останеше отворено за последното гран при во Абу Даби на 25 ноември.

Ова е петти случај од 2014 до денес Мерцедес да ја освојува „двојната круна“, односно шампионските титули во индивидуална и тимска конкуренција.