Случувања Спорт

Во кои случаи Хамилтон ќе стане шампион уште во САД?

По успехот во Јапонија, пилотот на Мерцедес Луис Хамилтон може да стане шампион за сезоната 2018 уште во следната трка. Победата на „Сузука“ за Британецот беше четвртата последователна додека неговиот главен конкурент за титулата Себастијан Фетел доживеа неуспех, финиширајќи шести и овозможи разликата помеѓу него и Луис да порасне на 67 поени со четири преостанати круга.

Следната станица на Формула 1 е патеката во Остин, САД, каде што Хамилтон забележа некои од најсилните настапи. Тој освои пет од шесте натпревари, откако патеката се врати во календарот на Формула 1 во 2012 година, а во сезоната 2015 ја освои титулата токму таму, победувајќи го Нико Розберг.

Луис може да биде петкратен шампион по две недели, ако го напушти Тексас со водство од 75 поени или повеќе од Фетел. Таквата разлика Фетел нема да може да ја стопи до крајот на сезоната. Со други зборови, во САД Хамилтон мора да освои осум поени повеќе од Фетел.

Наједноставниот начин тоа да се случи е Хамилтон да победи на трката слично на последните две Гран При, а клубскиот колега Валтери Ботас да не дозволи Фетел да стигне до втората позиција. Ако Луис заврши на второто место, Фетел мора да биде на четвртата или пониската позиција. Ако Луис заврши трето, Себ не треба да заврши во првите шест.

Имајќи предвид дека Хамилтон не завршил ниту една трка оваа сезона без да биде на подиумот, тешко е да се замисли дека тоа ќе се случи токму во Тексас. Ако сепак се случи тоа, еве каде треба да заврши Фетел, за да ги задржи своите шанси живи: Ако Хамилтон финишира четврти, Фетел треба да влезе во топ 7; ако Хамилтон заврши шести, Фетел треба да е од редот на топ 10, а ако Хамилтон остане седми или надолу, интригата за титулата ќе продолжи во Мексико.

Close