Кичево Случувања

Немањето на анестезиолог го остави Кичево без првороденче во Новата година

Поради немање на анестезиолог кој би асистирал во првото годинешно породување во кичевската болница, среќната мајка мораше да отпатува за Охрид, каде е извршено породувањето.

Инаку, ова не е прв случај родилки во поодмината бременост да се препраќаат во други градови, поради дефицит од анестезиолози во кичевската болница, проблем кој со години се провлекува во оваа здравствена установа.

-Денес ќе беше извршено првото породување во нашата болница во оваа календарска година, но немањето анестезиолог нè принуди на идната мајка да и дадеме упат и таа породувањето да го изврши во Охридската болница. Поради дефицит од анестезиолози во нашата болница, најмалку педесетина породувања во текот на годината се помалку во нашиот оддел, и овој проблем ќе нè следи сè дотогаш додека целосно не се екипира оваа здравствена установа – вели Д-р.Ѓоко Дичоски, гинеколог-акушер во кичевската општа болница.

Според него, од година во година бројот на новороденчиња во кичевската болница е во опаѓање, така во 2010 година имало 420 породувања, додека во изминатава година тој број е речиси преполовен и изнесува 230.

– Причините за ова намалување на бројот на новороденчиња се должи на иселувањето на младите во фертилниот период, како и горенаведениот проблем, односно немањето на доволно анестезиолози во нашата болница – нагласи Дичоски.

Инаку, кичевската болница располага со еден анестезиолог, кој треба да опслужува население од околу 70.000 жители од три општини и тоа Кичево, Пласница и Брод.

Извор: Зоран Антоски