Поларниот бран кој ја зафати нашата држава утринава го достигна својот максимум. Ова утро најниска температура е измерена во Битола, и тоа -22 степени, потоа следуваат Скопје – Петровец каде се измерени -17 степени, во Берово -16 степени, во Крива Паланка, Тетово, Демир Капија и во Маврово се измерени -15 степени, во Прилеп -14 степени, во Штип и Струмица -13 степени, Скопје – Зајчев рид -8 степени и во Гевгелија ова утро беше најтопло каде се измерени -4 степени.

Како што веќе најавивме, студено со максимални температури кој ќе се искачуваат во интервалот од -5 до 5 степени ќе се задржи и денес, додека во утринските часови студено ќе се задржи и во следните неколку денови кога минималните температури понекаде ќе се спуштат и под -10 степени.

Денес времето во Македонија ќе биде сончево и студено со мала до умерена локална облачност. Ќе дува слаб до умерен ветер од северозападен правец и истиот на некои места повремено ќе засилува. Максималните дневни температури ќе се искачуваат во интервалот од -5 до 5 степени.

Во Скопје и околината времето ќе биде сончево и студено со мала облачност и со слаб северен ветер. Максималната температура ќе се искачи до околу 1 степен.

Во следните денови времето ќе биде претежно стабилно, суво и сончево, повремено со умерена облачност. Утре доцна попладне и навечер на планинските места ќе има услови за сосема слабо и локално провејување на снег.Ќе дува слаб до умерен, а во четврток Долж Повардарието и на исток повремено засилен ветер од северозападен правец.

Минималните температури и понатаму ќе бидат доста ниски и понекаде ќе се спуштаат под -10 степени, додека максималните ќе бидат во пораст, особено од четврток кога ќе се искачуваат во интервалот од 3 до 11 степени.

/Славчо Попоски