Почнувајќи од вечерва и тоа од западните предели ќе има врнежи од дожд и снег на планините. Сето ова е под влијание на циклонска активност и на влажен воздушен бран од запад.

Во текот на утрешниот ден врнежите ќе се прошират насекаде и локално ќе бидат ПОИНТЕНЗИВНИ, особено на запад и исток каде локално ќе наврнат околу 20 л/м2 воден талог, додека на планинските места снежната покривка ќе се зголемува.

Поради спуштање на  ЗНАЧИТЕЛНО ПОСТУДЕНА воздушна маса од север, во текот на утрешниот ден ќе започне да дува ЗАСИЛЕН ветер од северен и од северозападен правец кој повремено на некои места ќе достигнува брзина од над 70 км/час. Токму ова ќе услови пад на температурите на воздухот за 7 до 10 степени во однос на сегашните.

Кон крајот на утрешниот ден како и во текот на утрешната ноќ, локално провејување на снег ќе има и на некои пониски места. Максималната дневна температура утре ќе се искачува во интервалот од 4 до 10 степени, додека во најтоплите предели истите има услови да се искачат до околу 15 степени, меѓутоа во попладневните и вечерните часови значително ќе опаѓаат.

Потоа од вторник следува променливо облачно време со сончеви периоди и со повремени послаби локални врнежи од дожд, додека на планините ќе провејува снег.

Наутро температурите на повеќе места ќе се спуштат под нулата, односно истите ќе се спуштаат во интервалот од -6 до 2 степени. Максималните дневни пак ќе бидат пониски за разлика од сегашните и ќе се искачуваат во интервалот од 4 до 13 степени.

Пишува: Славчо Попоски