Кичево денес: Концерт „Оперски Доживувања“ на кичевчанката Мартина Аврамоска и познатиот тенор Влатко Груевски

Денес на ден 14.06.2019 година, петок, во НУЦК “Кочо Рацин“ во Кичево, со почеток во 19 часот, ќе биде одржан концертот “Оперски Доживувања“, концерт кој е дел од концертната сезона на Влатко Груевски насловена “The Art of Power“ или во превод “Уметноста на моќта“.

Солисти на концертот се Мартина Аврамоска – сопран и Влатко Груевски – тенор, придружувани на пијано од нивниот уметнички соработник Андреј Наунов.

Влатко Груевски е еден од најпознатите оперски изведувачи во нашата земја, со голем број одржани концерти и настапи од областа на високата култура и уметност. Неговата биографија вклучува настапи на најпознатите културни фестивали во државата како “Битфест“, “Карпошово лето“, “Десет дена крушевска република“, “Град на културата“ и тн. Настапи за највисоките државни установи и значајни државни настани. Награди и признанија за неговата работа и талент.

Мартина Аврамоска е сопран, родена во Кичево. Нејзините заложби во однос на нејзините достигнувања во уметноста вродуваат со плод. Дипломиран пејач на Факултетот за музичка уметност во Скопје, моментално вработена во Националната Опера и Балет – Скопје.

Андреј Наунов е пијанист, композитор и диригент вработен во Национална Опера и Балет – Скопје. Уметнички соработник на Влатко Груевски од почетокот на неговата кариера. Прв студент на познатиот пијанист од светски рамки Симон Трпчески. Неговата биографија вклучува огромен број на концерти со првенци од целиот свет, диригенти од светски рамки и посветена работа кон студентите на ФМУ.

Концертот “Оперски доживувања“ опфаќа едни од најпознатите бисери на оперската уметност, влучуваќи ги познатите канцони како “’O sole mio“, “Non ti scordar di me“ и тн. најпознатата тема “Time to say goodbye“, неизбежната арија на заводничката Кармен и уште многу познати музички класици кои уверуваме дека ќе бидат мелем за душата и за кратко ќе ве одведат во светот на уживањето и задоволството.