Неколку силни земјотреси ја потресоа Јапонија. Издадени се предупредувања за цунами за префектурите Ишикава, Ниигата и Тојама. Надлежните апелираат граѓаните да се евакуираат на безбедни локации. Издадено е ново предупредување за земјотрес. Без струја останаа 36.000 домаќинства. Нема опасност за нуклеарнa катастрофа.

Шест лица се затрупани под урнати куќи во градот Ваџима по земјотресот со јачина од 7,6 степени според Рихтеровата скала што ја погоди јапонската префектура Ишикава на брегот на Јапонското Море, соопшти владата.

Пожар од големи размери избувна и во Ваџима по земјотресот, изјави владиниот секретар Јошимаса Хајаши на вонредна прес-конференција, пренесува новинската агенција Кјодо.

Новинарите од јавниот сервис NHK ги повикаа жителите да се засолнат на повисоките места и покрај студот, додека во позадина се слушаше пораката „ЕВАКУИРАЈ“.

„Разбираме дека вашиот дом, дека сите работи ви се скапоцени, но вашите животи се над тоа“, им порача водителот на гледачите.

Луѓето објавија видеа од куќите, возовите и метрото како се тресат за време на земјотресот.

Повеќе од 20 земјотреси со јачина од 4 степени и повеќе ја погодија централна Јапонија за нешто повеќе од 90 минути, соопшти Јапонската метеоролошка агенција (ЈМА).

Најсилниот земјотрес е регистриран во 16:10 часот по локално време, со јачина од 7,6 степени.

Неколку локални медиуми објавија дека ова е првпат властите да „предупредат на големо цунами“ од 2011 година, кога силен земјотрес го погоди североисточниот дел на Јапонија.

Затворени се сите главни автопати во близина на епицентарот на земјотресот.

Над 36.000 домаќинства останаа без струја во оваа област, објави главниот снабдувач на струја Хокурику електрик павр.

Јапонските нуклеарни власти соопштија дека „нема ризик од истекување на радиоактивен материјал од нуклеарните централи“ во областите погодени од земјотресите и цунамито.

Јошимаса Хајаши, портпарол на владата, ги предупреди жителите да се подготват за нови земјотреси.

Метеоролошката агенција на Јужна Кореја предупреди дека цунами бранови до 0,3 метри би можеле да го погодат источниот брег на земјата во периодот од 18:29 до 19:17 часот по локално време.

Агенцијата ги повикува жителите на планинската провинција Гангвон да се евакуираат на повисоките места.

Русија издаде предупредување за цунами во пристанишните градови на Далечниот исток Владивосток и Находка, објави нејзината државна новинска агенција ТАСС.

Во 2011 година, Јапонија беше погодена од земјотрес со јачина од 9 степени, а цунамито што следеше ги уништи нејзините североисточни крајбрежни заедници, убивајќи речиси 18.000 луѓе.

Десетици илјади жители мораа да ги напуштат своите домови.

Цунамито предизвика нуклеарно топење во централата Фукушима, предизвикувајќи ја најтешката нуклеарна несреќа од Чернобил во Украина.