Следете не

Литература

Духовната поезија на кичевчанката Наташа Наумоска – таинствена лествица од земното кон небесното

Објавено пред

на

Денес имавме еден необичен разговор со нашата кичевчанка Наташа Наумоска, еден од основачите, а воедно и член на литературниот клуб „Китка“ од Кичево. Автор на повеќе стихозбирки од кои поголем дел се со духовна содржина, а сите се објавени во електронска верзија на веб просторот „Македоника“. Овојпат топло ги препорачуваме како поткрепа низ духовната пролет на велигденскиот пост до светлото Христово Воскресение како овој разговор така и нејзините стихословија.

1. Како се љуби Бог?
Да претпоставиме дека некој нè навредил, не само еднаш, туку повеќепати. И поради таа навреда ни било тешко, затоа што сме почувствувале неправда; но, сепак сме простиле. Сме се потрудиле да заборавиме. Поради нашиот Спасител, Господа. Поради Неговата заповед да го возљубиме ближниот свој како себеси (Матеј 22,39). Ете, така се љуби Бог.

2. Колку се љуби Бог?
Невозможно е да ги дофатиш облаците, но ги гледаш; и им се радуваш. Невозможно е да го допреш сонцето, но неговата топлина ја чувствуваш. Да помислиш да тргнеш накај нив за да ги дофатиш, ќе ти треба вечноста цела и пак нема да ги стигнеш. Можеби во поим имаат крај, (зашто сè создадено од Бога има крај, само Бог е без почеток и без крај, зашто Он Самиот е Почеток и Крај, Алфа и Омега (Откр. 1,8)), но во суштина се недофатливи и ни изгледаат безгранични. Таков е и Бог – Безграничен. И колку што би било нашето патување до облаците и до сонцето незамисливо, бескрајно… Ете, толку се љуби и Бог. Незамисливо. И бескрајно.

3. Зошто Му се верува на Бога?
Поради љубов. Без интерес, без очекување на возврат за било што. Толку е едноставно! Нам ни е потребен Бог, ние Нему не! Да речеме, некој човек оди во војна; и остава зад себе сè: семејството, домот, имотот. И воопшто не се грижи за ништо. Пак, некој ќе рече: „Треба да е луд, па да не се грижи.“ Да, треба да е луд, но во тоа лудило е најголемата радост. Такви да ги имаше повеќе, камо таа среќа. Малкумина биле јуродиви Христа ради; но вечно им е името на сите. Христос со слава ги овенча; така им возврати за довербата. Зашто Христос никому должен не останува, а ние сме должни. И тие што немаат никаков долг, должни се – на Бога. За животот што го имаат; за воздухот што го дишат. Бедно е нашето благодарење, за изобилните блага што Бог ги истура катаден пред нас, а ние не ги гледаме.

4. Колку треба да Му се верува на Бога?
Како многустрадалниот Јов – безрезервно. До крајот на краиштата. Колку може мајката да ги сака децата свои? И колку детето може да ги сака родителите свои? Но Бог се љуби повеќе. Кога може дури и од ближните да се откаже човек заради Христа, во смисла да ги остави на Неговата милост и на Неговата промисла – тоа се нарекува доверба во Бога и во Неговата промисла. Така се манифестира верата во Троединиот Бог и толку на Бога Му се верува! Исто така, ќе ја искористам оваа прилика и ќе кажам дека ние православните веруваме во Бога Сесвета Троица – Отецот, Синот и Светиот Дух, Троица Единосуштна и Неразделна, Којшто Бог живее во љубовна заедница од вечност. И не е Светото Тројство или Светата Тројца, туку Сесвета Троица.

5. Дали надежта е во Бога?
Самиот Бог е поим за надеж; Он е Надеж. Без Него ниту сонцето дење ќе свети, ниту месечината ноќе ќе изгрева. Да знаеш дека сите услови се против тебе, а ти повторно да опстојуваш, да чувствуваш дека многумина се креваат неправедно против тебе, а ти длабоко во себе не се плашиш зашто не чекаш помош човечка, туку од Господа и продолжуваш понатаму… Тогаш, што е тоа, ако не е надеж во Бога?!?

6. Како Му се благодари на Бога?
Тогаш, кога е лесно, среќни сме, се радуваме; веселие и песна во срцето има. Благодарни сме на Бога – така си мислиме во себе. Но тогаш, кога животот многу препреки и сопки ни става на патот, немоќни сме да ги избегнеме; се сопнуваме, паѓаме, се повредуваме, повторно стануваме и повторно паѓаме и пак стануваме… и така безброј пати. И сето тоа со насмевка на лицето. Така Му се благодари на Бога! Ете, затоа јас со поезија Го прославувам и Му благодарам на Бога за сè.

***
ЗА СВЕТЛОТО БЛАГОДАРЕЊЕ

И ќе се зарадува Господ
за срцето што во благодарие Му извикува:
„Ти благодарам Господи!“;
него достојно ќе го возвеличи.

Ќе погледне Бог на она срце
кое со благодарие воскликнува кон Мајката Бога што Го роди,
за Бога што благодари,
тоа срце без благослов да остане нема!

Ќе ги види Бог оние раце што кон небото се подаваат
за парчето леб да заблагодарат;
Ќе ја види Бог онаа уста што милосрдно благодари
жедна што не е.

Се радува Бог за она срце човечко што Му благодари постојано,
па и за маките што ги трпи,
така Бог ги испитува силниците – оние што ги сака,
така кон Себе ги приближува…

***
За љубовта, онаа вистинската (најдобро е опишана во Првото послание на светиот апостол Павле до Коринтјаните – 1. Кор. 13 гл.), и која не би се нарекувала љубов доколку не е вистинска, но за да ја разликуваме од лицемерната, која сепак, за жал, постои…

ВИСТИНСКАТА ЉУБОВ

Вистинската љубов Го моли Бога за сите, посебно за оној што навистина го љуби;
Вистинската љубов Го моли Бога вр себе да ја земе тагата наближниот свој;
Вистинската љубов ја бара од Бога болката на оној што го сака;
Вистинската љубов не се расфрла со тајните на оној што ѝ ги доверил;
Вистинската љубов трпение има и тогаш кога најмалку може да издржи;
Вистинската љубов не сожалува, таа се восхитува, таа не се превознесува;
Вистинската љубов со збор прегрнува, со молитва милува, гласот не го повишува;
Вистинската љубов така лесно не се разочарува, се бори дури и кога никаква надеж нема, лесно не се откажува;
Вистинската љубов храбро се држи, дури и кога под нозете е разнишано тлото, силата ја црпи одозгора – од Господа;
Вистинската љубов силно верува, верата нејзина дури и неверното срце го пренасочува;
Вистинската љубов многу простува, не гледа лошо во туѓите постапки, дури и кога ги има, таа во себе се труди да ги оправда, во добро се труди да ги претвори;
Вистинската љубов на сè се надева, како мало дете надежно срце има;
Вистинската љубов оди напред во огнот на непријателот, саканите да ги заштити, притоа не мислејќи на себе дали ќе се изгори;
Вистинската љубов дава сè што има за насмевката на љубените свои;
Вистинската љубов наликува на славеј, чија песна ја буди пролетта во срцето на саканите;
Вистинската љубов е извор, од неговата свежина постојано цветаат срцата на оние кои од него пијат;
Вистинската љубов и за најмалиот гест на внимание чувствува благодарие;
Вистинската љубов кога нема со што да возврати за љубовта и добрината, со молитва, со крвта на своето срце, тоа го прави;
Вистинската љубов е како сонце, огрева после секое невреме;
Вистинската љубов често подарува, но самата по себе е најголем подарок;
Вистинската љубов стои во позадина, ги пушта напред нестрпливите, своите површни чувства да ги искажат;
Вистинската љубов не љубомори, таа знае дека секој е посебен и своја вредност има;
Вистинската љубов е самостојна, таа не зависи од љубовта на љубените;
Вистинската љубов е силна, таа на себе е поддршка зашто не се самосожалува;
Вистинската љубов знае нелицемерно да почувствува вина, дури и когаа виновна не е;
Вистинската љубов во пламенот на неправдата се фрла да изгори, да се спасат оние кои ги љуби;
Вистинската љубов не се оправдува, зашто секогаш се преиспитува и секогаш вината во себе ја бара;
Вистинската љубов мисли дека сите други се во право, дека сите се добри; дека се сите подобри од неа;
Вистинската љубов знае дека сè што ќе направи е малку, дека секогаш може повеќе и подобро;
Вистинската љубов простува, дури и кога нема основа за тоа;
Вистинската љубов ја знае силата на насмевката, затоа постојано нежно ја подарува;
Вистинската љубов ја знае силата на убавиот збор, затоа често го кажува;
Вистинската љубов ја знае штетата на лошиот збор, затоа го премолчува;
Вистинската љубов трпение пројавува за сè околу неа што се случува;
Вистинската љубов со своето смирение пример е за тие околу себе;
Вистинската љубов се надева, но не бара, тоа што треба да се случи да ја одмине;
Вистинската љубов ја знае болката на Распетието и доброволно ја трпи;
Вистинската љубов ја претпоставува (чувствува) радоста на Воскресението и со нетрпение го очекува;
Вистинската љубов секој ја има, без разлика дали ја заслужува;
Вистинската љубов е околу секој, поточно во секој, само треба да се побара;
Вистинската љубов вели: „Исус Христос победува!“;
Вистинската љубов е од и во Господа и од Него произлегува и преку Него ни се дарува.
Самиот Он е Љубовта – Вистинската Љубов.

ЗА ЖИВОТОТ  (кој е награда од Бога што треба да ја оправдаме со своето постоење)

Понекогаш, животот е како Саул –
кога лошиот дух ќе го опседне,
напаѓа со стрели отровни, гаѓа кај што ќе стигне…
Го молам Господ со сето срце свое да бидам како пророк Давид –
штом тој по мене со стрели ќе напаѓа,
јас со молитва кон Бога како на харфа да свирам,
та злобниот Саул така да го смирам.
Ќе Го молам Господ мудрост да ми дари,
како Соломон чесно ќе Го замолам,
доброто од злото да ми помогне да ги разликувам,
Он разум и верност да стави во срцето мое.
Како на Мојсеј силна вера до последниот ден.
И кротоста на Авраам во срце да ми ја напише,
а трпеливоста на многустрадалниот Јов
в душа да ми ја насели,
со благодарието на радоста да ме украси,
како свети Јован Дамаскин да ме благослови
додека дишам да Му пеам
благодарствени песнопенија;
додека постојам да Му пишувам
богоугодни стихословија…

Литература

Драги родители, „IQ Up!“ едукација за вашето дете сега и во Кичево, уписите се во тек, регистрирајте се за бесплатен пробен час!

Објавено пред

на

Сега и во Кичево „IQ Up!“, специјална едукацијата која е базирана на иновативна методологија во која се имплементирани најсовремени и докажани техники, пристапи и методи за едуцирање на децата. Забавни и интерактивни програми во кои се вкрстуваат проблематиките на сите природни науки, математика, технологија, инженерство, уметност, литература и програмирање.

За секоја програма имаат специјално дизајнирани сетови од дидактички материјали и нагледни средства кои учителите ги користат на часовите за да создадат магија во наставата, додека IQ Up! училниците, кои наликуваат на забавни лаборатории, се дизајнирани да ги инспирираат децата да учат, создаваат и иновираат.

За себе велат пред сè дека целта е едукација на стекнување функционално знаење и умствени вештини за целосен интелектуален развој на нашите ученици.

– На нашите часови, учениците учат преку експериментирање, истражување, анализирање, работа на реални проекти и решавање на проблеми. На тој начин децата стекнуваат функционално и практично знаење, многу полесно и поквалитетно ги разбираат наставните теми и концепти, но и развиваат умствени вештини.
Логичко размислување, креативност, анлитичко размислување и способност за решавање на проблеми се дел од интелектуалните вештини кои ги развиваат децата преку нашата едукација, а се многу важни за нивниот развој и можности во 21 век.

 

📝 Регистрирајте се за бесплатен пробен час, стартот е од месец септември преку линкот ТУКА или контактирајте на тел бр. ☎️ 071/777-939.
✅ Заследете ја нивната официјална фејсбук страница „IQ UP – КичевоТУКА и следете ги сите новости!

Прочитај повеќе...

Литература

Кичевчани помеѓу наградените на овогодинешната меѓународна поетска манифестација „Охридски поетски бисер“

Објавено пред

на

Во Црквата „Успение на Пресвета Богородица“ – Каменско по седми пат се реализираше Меѓународната поетска манифестација „Охридски поетски бисер“ во организација на истоименото Здружение за литература и култура „Охридски поетски бисер“, со поддршка на Општина Охрид. Оваа манифестација има за цел меѓународна промоција на поетската реч, македонскиот јазик и македонската литература, градот Охрид и Македонија

Нашите сограѓани Лидија Аврамоска, Наташа Наумоска и Јован Миноски од Кичево беа помеѓу наградените во категоријата на Македонски автори на овогодинешната меѓународната поетска манифестација „Охридски Поетски Бисер“.

– За сите дарови Му благодарам на Бога, па и за овој дар, за оваа награда од страна на организаторите на манифестацијата Охридски поетски бисер, во која зедоа учество околу 150 македонски автори, и околу 60 од регионот и од дијаспората, а на која ми беше чест и задоволство да учествувам.

– Затоа тоа што истата испраќа една силна порака до верниот народ за зачувување на вистинските морални вредности на кои новите времиња не само што не може да ги уништат, туку не може воопшто да ги разнишаат. Затоа што нашиот народ е народ со висока свест за човечноста, а таа извира од длабоките корени на традицијата, додека организаторите на оваа традиционална манифестација токму тоа и го прават, ги негуваат тие вредности и го приближуваат народот кон човечноста, а со тоа и кон божественото.

– Им благодарам што и преку наградувањето на стиховите на „Себепознание“ го докажаа тоа со тоа што третото место ни го доделија мене и на мојата колешка Лидија Аврамоска. И преку овој гест се потврдува поговорката дека сѐ што се дели се намалува, само љубовта кога се дели станува уште поголема. А Божествената љубов е токму таква, за нашиот портал додаде г-ѓа Наумоска и ни испрати текст од стиховите на „Себепознание

Ѕирка, довикува
од самиот раб на провалијата
наречена суета.
Понекогаш ни изгледа блиску
заради лажното смирение.
Никако не може
нашето ,,јас” да разбере
дека лажно е сѐ.
Оној ден штом осамне
утрото на вистината,
дека не на дното
ами сме под него разбереме,
тивко ќе нѐ прегрне
бескрајна смиреност,
ќе одекнува силно аплаузот
на едно себепознание,
додека образот на нашето ,,јас”
силно ќе црвенее од срам
поради нашата
правлива безвредност.

– Охридски поетски бисер е манифестација од меѓународен карактер на која имаше поети од Македоноја, Србија, Црна гора и БиХ. Од испратени 160-тина творби од македонски автори беа одбрани 50-тина. Имаше многу убави песни кои секако заалужуваа да бидат наградени, но комисијата одлучи да ми го додели 3-то место на мое огромно задоволство кое го делев со Наташа Наумоска исто така од Кичево и член на литературниот клуб „Китка“. Ова е манифестација има благородна мисија во афирмирањето, пренесувањето и зачувувањето на македонскиот јазик и поезија, не само во Македонија, туку и низ светот, а со тоа и нам да станеме дел од промоторите на пишуваниот поетски, литературен македонски јазик – за порта.мк исто така додава добитничката Аврамоска и ни ја претстави својата творба „Илузија“

Сонот лекува,
но е само пауза во бекството.
Улиците се тмурни
за фантазерите и романтичарите.
Полни се со безнадежност
Среќата е залутана
Каде е патоказот
кон она што се вика дом…
Осамени лица
под испукано небо
во џеб мирисот
на безгрижно детство
и топол леб.
Гужва и галама
на луѓе гладни,
невидливи и ладни
никој, никого на мир не остава,
а никој за никого не се грижи.
Сонцето е се подалеку и поладно.
Сакам да заспијам
и да се разбудам
кај што сонцето ја топли душата..
на некое друго место
и во некое друго време…

Прочитај повеќе...

Литература

Излезе книгата „Гласот на предците“, која претставува зборник на македонски народни преданија од Христијан Аџиоски

Објавено пред

на

Секоја страница исплетува приказна со посебна македонска судбина, која како ехо нè наоѓа… и одѕвонува во нашата свест. Низ приказните во овој мал зборник, ќе ја пропатувате цела Македонија, барем накратко ќе бидете сведоци на различни настани одделени со стотици години, читајќи ги судбините на нашите предци, ќе можете за миг да се соживеете со нивното време!

Во преданијата кои ја раскажуваат Македонија, ќе сретнете непокор, јунаштво, предавства, љубов, мудрости, приказни во кои дефилираат цареви,
принцези, војсководци, бегови, паши, невести, ѓаволи, доаѓаат и светците како заштитници, а прелетува и по некој змеј.

Кратка содржина:

Како Свети Јован го спасил Бигорскиот манастир од уништување? Како од солзи можат да се создадат езера? Зошто е проколната грешната принцеза Струма?
Како Мариово добило царски ферман за навек да остане христијанско? За кого клетвата значи скаменување? Зошто мајмун не игра во Прилеп?
Зошто ѓаволот не успеал да го догради ѕидот во Овче Поле? Како копјето станува волшебно кога ќе ја чуе песната на соколот?
Дали под Плетвар има подземни пештери кои водат до Солун? Како настанал охридскиот чун? Колку долго Бела Ица го чекала царот Александар да дојде по неа?

На сите овие прашања, одговорите се кријат во овој зборник – овде се собрани само дел од приказните со кои можеме читајќи да пропатуваме низ времето на прастарата и никогаш недораскажана Македонија. Преданијата од нашите предци ги наследуваме со вековен аманет да ги раскажеме, запишеме и да им подариме вечност, а со тоа ги овековечуваме и оние кои нам ни ги раскажале.

Прочитај повеќе...

Facebook

Последни објави

Култура12 минути

Сеноќно молитвено бдение во нашиот манастир „Св. Богородица – Пречиста“ по повод големиот празник Воведение на Пресвета Богородица

Почитувани возљубени, со особена радост ве информираме дека на 3 декември, во 21 часот ќе се случува сеноќното молитвено бдение во...

Спорт7 часа

Судиите од првата македонска фудбалска лига супериорно ја завршиле работата на мечевите од 16-то коло

Судиска комисија ги разгледа спорните моменти од 16 коло на ПРВА МФЛ, и ги донесе следните заклучоци:  На натпреварот Фк.Шкендија-Фк. Работнички одигран...

Автомобили9 часа

Револуција или најгрдиот автомобил во историјата? Cybertruck пристигна (ФОТО+ВИДЕО)

Елон Маск конечно ја претстави својата визија за американскиот симбол – (pick-up truck). Тоа е многу грдо возило. Но, можеби...

Магазин10 часа

Google од денеска брише неактивни сметки! Сепак, постои начин да се зачуваат податоци

Технолошкиот гигант Google од денеска брише неактивни сметки. Компанијата претходно го најави овој потег за да ја зголеми безбедноста на...

Магазин10 часа

Сопственикот на TikTok, ByteDance, најави отпуштања

ByteDance , мајка на ТикТок, укинува стотици работни места во својот оддел за игри, изјави за CNBC лице запознаено со...

Хороскоп23 часа

Месечен Хороскоп (декември)

ОВЕН Љубов: На почетокот на месец декември сте поканети на забава со вашите драги пријатели, но не сте во можност...

Временска прогноза1 ден

Краткотрајно топло време, но голема разлика во температури, проследете ја најновата метео анализа

Во следниот период, односно до самиот крај на оваа седмица Балканот го очекува голем температурен шок (огромна разлика на температурите...

Хороскоп2 дена

Хороскоп за четврток (30 ноември)

ОВЕН Марс сепак го зголемува вашиот стрес, бидејќи неговата главна идеја е да работите побрзо – ако се притиснете на...

Македонија2 дена

МВР демантира дека изгубеното девојче е пронајдено во соседна држава и апелира да ме се шират невистини!

Министерството за внатрешни работи ги демантира дезинформациите објавени на порталот „Курир“ дека 14-годишната В.Ѓ., за која на 27 овој месец...

Автомобили2 дена

Како да одмрзнете замрзната брава на автомобил: Ова се трикови кои можат да ви заштедат и време и нерви во студените зимски денови (ВИДЕО)

Ви претставуваме три методи кои беа тестирани пред камери од експерти, но и од самите возачи. Малкумина и онака сакаат...

НАЈЧИТАНИ