Кичевската Православна црква Св.Апостоли Петар и Павле преку соопштение ги известува верниците кои ја слават домашната слава и именденот посветени на свети Николај Мирликијски (Св.Никола), дека на ден 18.12.2024 година (среда) со почеток од 06:00 часот, па се до 15:30 часот ќе се благословуваат славските колачи.

Исто така, на ден 19.12.2024 година (четврток), ќе се осветуваат славските колачи со почеток од 07:30 часот, па сѐ до 12:00 часот на пладне.

Се повикуваат верниците да бидат трпеливи додека очекуваат да им се благословат колачите, се вели во интегралното соопштение за јавноста.

Кичево традиционално се подготвува за празничните денови, на голем радост на најмалите но и на возрасните. И оваа година нашиот град ќе биде украсен со Витлеемската Пештера и природна елка накитена со убави лампиони и подароци, поставени во центарот на градот на старото место минатата година.

Активно се спрема и „Хуманитарниот Божиќен Базар“ кој ќе започне официјално од 2-ри јануари (четврток) од 18:00ч, а ќе имаме одлична програма и многу забава.

Благодарение на група граѓани кои несебично помагаат околу ефикасноста на организацијата и допринесуваат и оваа година ќе блесне најдобриот спектакл во нашиот град, овој пат збогатен со многу изненадувања, богата трпеза за уште поголем хуманитарен карактер – како главно мото!

За сите новости и дополнителни изненадувања, како и за комплетната агенда ќе ве известуваме благовремено!

p.s. Сите кои сакаат да бидат дел и да придонесат, можат да ни се приклучат и заеднички да направиме нешто повеќе за нас и нашите генерации кои доаѓаат по нас, контрактирајте не со порака ТУКА, или на тел. ☎️ 078/655-993

Повеќе информации за „Хуманитарниот Божиќен Базар“ ќе најдете ТУКА

Со благослов на нашиот возљубен Старец, епископот Антаниски г. Партениј, дечињата од реканскиот регион, викендов беа во посета на нашиот манастир, каде заедно со своите домаќини од Кичево – членовите на хорот Митрополит Козма Пречистански – зедоа учество не само во секојдневниот богослужбен ритам на манастирот, туку присуствуваа и на специјално организираните активности за нив.

Пеењето на Божиќни каланди, часови по Вероучение, запознавање со знаменитостите на градот Кичево, како и со историјата на нашиот древен манастир посветен на Богомајката Пречиста, во нив внесе голем ентузијазам, будејќи им нови креативни сили за учење и создавање. Нивните прекрасни гласови одекнуваа низ манастирските ѕидини, носејќи им радост и топлина на сите присутни.
Оваа посета на манастирот Пречиста, беше одлична можност за децата од реканскиот регион да стекнат многу нови пријателства и да ги зацврстат другарските врски со своите врсници од градот Кичево.

Посетата беше надополнета и со многу изненадувања, меѓу кои и она што беше приредено од страна на почитуваните пријатели на нашата света Обител, семејството Андоноски од Битола, кои подготвија забавни активности, како и празнично пакетче за секое од дете.

Изразуваме огромна благодарност кон нашиот Старец и Епископ Антаниски г. Партениј, за тоа што ни овозможи да бидеме дел од една прекрасна, чиста и искрена дружба, имајќи можност да придонесеме за доближување на чистите детски срца до Бога, пишува Свештена Пречистанска Обител „Благовештение на Пресвета Богородица“