Првото коло од новата сезона во Лигата на шампионите започна во вистински спектакуларен стил. На 18-те одиграни натпревари беа постигнати дури 67 погодоци, што јасно говори за силниот офанзивен пристап на повеќето клубови и желбата уште од самиот почеток да се дојде до што подобра позиција во групната фаза.

Најмногу внимание привлече мечот во Торино, каде што Јувентус и Борусија Дортмунд одиграа реми со неверојатни 4:4. Душан Влаховиќ, кој натпреварот го започна од клупата, влезе во игра во 60-тата минута и успеа да постигне два клучни гола – првиот во 67-та минута, а вториот во судиското продолжение, со што се претвори во херој на домаќините. Натпреварот ја откри напаѓачката моќ на двата тима, но истовремено и слабостите во дефанзивата.

Слично возбудливи беа и дуелите Ливерпул – Атлетико Мадрид (3:2) и Баерн Минхен – Челзи (3:1), кои ја потврдија жестоката конкуренција во ова натпреварување. Од друга страна, некои средби беа далеку потактички, како Олимпијакос – Пафос (0:0).

Првото коло донесе и вистински сензации: Карабах ја совлада Бенфика, Кралска унија триумфираше против ПСВ, а Клуб Бриж ја изненади Монако.

Меѓу најубедливите резултати се издвојуваат:

• ПСЖ – Аталанта 4:0

• Ајнтрахт Франкфурт – Галатасарај 5:1

• Спортинг – Каират 4:1

• Клуб Бриж – Монако 4:1

Сите овие резултати покажуваат дека веќе на самиот старт секој бод и секој постигнат гол имаат огромна тежина, бидејќи пласманот во нокаут фазата е ограничен. Според форматот, најдобрите осум екипи директно ќе заминат во осминафиналето, а тимовите од 9-то до 24-то место ќе разигруваат за дополнителните места. Клубовите што ќе завршат под оваа линија ја завршуваат европската сезона уште во оваа фаза, без премин во Лигата на Европа.

Роберт Просинечки повеќе нема да ја извршува функцијата селектор на фудбалската репрезентација на Црна Гора. На седницата на Извршниот одбор што ќе се одржи во петок, се очекува претседателот Дејан Савиќевиќ и раководството на Фудбалскиот сојуз официјално да ја потврдат одлуката за негова смена.

До завршување на квалификацискиот циклус, улогата на главен тренер ќе ја преземе Мирко Вучиниќ – првиот капитен во историјата на националниот тим, кој веќе подолг период е дел од стручниот штаб.

Просинечки беше седмиот селектор на Црна Гора по обновувањето на независноста, наследувајќи имиња како Зоран Филиповиќ, Златко Крањчар, Бранко Брновиќ, Љубиша Тумбаковиќ, Фарук Хаџибегиќ и Миодраг Радуловиќ.

Своето деби го имаше во март 2024 година со две победи во пријателски средби против Белорусија и Македонија во Анталија. Но, потоа следеше серија од седум порази – два во пријателски натпревари и пет во официјални – и само победата против Турција во Лигата на нации му го продолжи мандатот.

Во март оваа година Црна Гора запиша две тешки победи дома во квалификациите за Светското првенство, против Гибралтар и Фарските Острови. Сепак, новите порази – два од Чешка и еден од Хрватска – го запечатија неговото заминување.

Во вкупно 16 натпревари на клупата на Црна Гора, Просинечки оствари биланс од пет победи, едно реми и десет порази, пренесува српски „Журнал“

Недела, некогаш претпознатлив ден за фудбал на градскиот стадион во Кичево. Но денес за момент се чинеше дека токму го живееме тоа време, а зошто и да не го вратиме сјајот на тоа време?! Денес кичевчани покажаа дека љубовта кон фудбалот полека се враќа, а нашите момчиња тоа го крунисаа со одлично прикажана игра и победа од 3:1 против „ФК Вардар Брвеница“.

Речиси 80% полн капацитет на едната трибина и дел на другата со љубители на фудбалот уживаа во еден прекрасен ден со идеални услови за игра.

Серијата голови ја отвори Котески од 22м со еден маестрален шут уште во 33-та минута, веднаш потоа од далечина Калевски го искористи невниманието на гостинскиот голман и зголеми на 2:0. Третиот гол беше дело на Даутоски во 49-тата минута. За конечните 3:1 Спироски намали во финишот на мечот.

Натпреварот го водеа искусната тројка Марјан Стојаноски, Осман Зеќири и Никола Ѓорѓиевски.

– Можам да бидам задоволен од денешната игра на нашите момци. Активните тренинзи покажуваат резултати како на физичката подготвеност така и останатите битни работи кај фудбалерите. Ова е одличен резултат за почеток на првенството. Ја користам оваа прилика да им се заблагодарам на кичевчани кои дојдоа навистина во голем број и не бодреа до самиот финиш на мечот. Ве уверувам дека ќе ги искористиме сите можности за нашиот сон да се исполни – „Влез во елитната лига“ – за Порта.мк истакна Бобан Дујковиќ, тренер на „ФК Напредок“