Младата репрезентација на Македонија до 17 години го одигра вториот контролен натпревар против соодветната селекција на Малта и успеа да издвојува убедлива победа со 3:0.

Нашите млади фудбалери, на тренинг центарот „Петар Милошевски” одиграа многу подобар меч од првата контролна пресметка и во второто полувреме успеаја да го скршат отпорот на селекцијата на Малта, постигнувајќи три гола за сосема заслужена победа.

Противникот во поголемиот дел од првото полувреме беше сконцентриран на одбрана на својот гол, чекајќи прилика од против напад. Нашите фудбалери немаа одговор и идеја за таквата поставеност, не успеавме да се заканиме посериозно по нивниот гол. Тео Николовски имаше една добра прилика, биеше од далечина, меѓутоа непрецизно.

Во продолжението одигравме одлично, решително и со поголема мотивација. Никола Величковски погоди за 1:0 во 53. минута од мечот. Веќе во следниот наш напад, Кире Стојанов погодува за 2:0. Мартин Ѓоргиевски асистираше за двата гола. Конечните 3:0 беа дело на Умерфарук Сулејман.

Никола Величковски, стрелецот на првиот гол за Македонија на денешната средба и еден од најдобрите поединци е задоволен од нашата игра, смета дека тимскиот дух што владее во селекцијата е еден од важните фактори за победата.

– Величковски: Пресреќен сум за постигнатиот погодок, мој прв во репрезентацијата. Се надевам дека во иднина ќе постигнам многу голови за овој дрес кој ми значи многу. Пред се сакам да се заблагодарам на селекторот и целиот стручен штаб за укажаната доверба. Одигравме одличен натпревар, посебно во второто полувреме. Сосема заслужено се радувавме на убедлива победа. Покажавме и на теренот дека многу повеќе ја посакуваме победата од противникот. И на првиот натпревар одигравме добро, но не успеавме да забележиме победа, пред се поради тоа што пропуштивме неколку добри прилики. Имаме квалитетна генерација која поседува одличен натпреварувачки и тимски дух и силно веруваме во нашиот квалитет. Нашата цел е јасна, на секој натпревар одиме на победа.

Првиот пријателски натпревар помеѓу овие две селекции заврши нерешено 1:1.

Контролен дуел, репрезентации до 17 години, Скопје;

Македонија: Давид Стојановиќ, Андреј Аризанкоски, Марко Стојилевски, Даниел Марковски, Матеј Јаневски, Мартин Ѓоргиевски (к), Никола Величковски, Адриан Зенделовски, Кире Стојанов, Мухамед Елмас, Зани Назифи;

Резерви: Диел Доко, Симеон Здравковски, Хадис Таири, Ѓорге Џеков, Тео Николовски, Дестан Адили, Амир Нухија, Александар Богданоски, Кире Стојанов;

Селектор: Тони Јакимоски;