Територијата на Македонија се до крајот на оваа недела ќе биде под влијание на висок воздушен притисок (Антициклон) кој постојано ќе условува стабилно, суво и сончево време, со мала до умерена локална облачност. Ќе биде претежно тивко, или ќе дува слаб променлив ветер.

Влажноста во воздухот ќе биде зголемена, а со оглед на тоа дека сме под влијание на Антициклон, по котлините ќе има појава на магла или на ниска облачност, особено во утринските  и во претпладневните часови, која во текот на денот краткотрајно ќе ослабне, за во ноќните часови повторно да се создаде.

И во Скопската котлина ќе има услови за појава на магла или на ниска облачност, додека во повисоките предели од котлината ќе биде сончево, повремено со мала до умерена локална облачност, а ќе биде претежно тивко, или ќе дува слаб ветер од променлив правец.

Што се однесува до температурите, тие наутро ќе бидат особено ниски и во поголем дел од Македонија ќе бидат под нулата и ќе се спуштаат во интервалот од -5 до 3 степени, додека особено во Беровскиот регион таа повремено ќе се спушта и под -5 степени, додека максималните дневни температури ќе се искачуваат во интервалот од 12 до 19 степени, само во југоисточните предели температурата повремено ќе се искачува до 20 степени.

Во Скопје наутро температурата ќе се спушта во интервалот помеѓу -1  и  2 степени, додека максималната температура ќе се искачува во интервалот помеѓу 16  и 18 степени, информира Славчо Попоски

Телеметриската сеизмолошка мрежа на Република Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, вечерва, 04.11.2024 година, во 20 часот и 35 минути, регистрираше земјотрес чиј епицентар припаѓа на скопско епицентрално подрачје, со Рихтерова локална магнитуда ML2.0.

Според досегашните податоци со кои располага опсерваторијата, земјотресот е почувствуван од населението на градот Скопје и околината, со интензитет од III степени според Европската макросеизмичка скала, известуваат од ЦУК.

Сериозни напади врз новинарите, решавање на нерешените случаи на напади врз медиумските работници, заштитата на јавниот интерес преку слободата на говор, транспарентноста на надлежните институции и соработката помеѓу еснафските здруженија со МВР и Јавното обвинителство, како и заштитата на новинарите беа дел од темите на кои се дискутираше за време на прес конференцијата која денеска ЗНМ ја организираше, а со која се одбележа Меѓународниот ден за ставање крај на неказнивоста за злосторствата против новинарите. На настанот покрај претседателот на ЗНМ, Младен Чадиковски, беа присутни и министерот за внатрешни работи Панче Тошковски, јавниот обвинител Љупчо Коцевски и претседателот на ССНМ, Павле Беловски.

Во своето обраќање, Чадиковски стави акцент на статистиката во однос на нападите на новинари, со акцент на последните два случаи, ризиците од SLAPP тужби, како и нерешените случаи од 27 април.

– „Безбедноста на медиумските работници и борбата против неказнивоста на злосторствата против нив е директно поврзана со демократските вредности на едно општество. Бараме итно решавање на сите отворени случаи во кои врз новинари се применува насилство. Вербалното насилство и малтретирањата, преку онлајн платформи, бара сериозен одговор од МВР и Обвинителството. Граѓаните бараат од нас верно да им служиме. Да не потклекнуваме на насилниците, да не шуруваме со политичките партии, да информираме за злоупотребите на бизнис моќниците. Затоа ни треба целосна поддршка, транспарентни и фер постапки, за да обезбедиме медиумски простор ослободен од страв и закани“ – истакна првиот човек на ЗНМ, Младен Чадиковски.

Повеќе ќе прочитате во продолжение на официјалниот линк од ЗНМ, ТУКА.

Извор: ЗНМ (Здружение на новинари)