Македонската А репрезентација денеска ги започнува подготовките за двата последни два натпревари од групата 3 во Лига на нации против Грузија (Тбилиси, 23. септември) и Бугарија (Скопје, 26. септември).

Поради повреда веќе е познато дека Дарко Чурлинов нема да биде во составот на селекцијата за двете пресметки, но дополнителни проблеми за селекторот на нашата најдобра репрезентација, Благоја Милевски се новите две откажувања поради повреда. Капитенот Стефан Ристовски (повреда на тетивата) и напаѓачот Ваљон Етеми (повреда на бутниот мускул),  исто така нема да можат да се стават на располагање за мечевите против Грузија и Бугарија.

Нашиот стручен штаб подоцна во текот на денот ќе соопшти за дополнителен повик во репрезентацијата.

Македонската репрезентација денеска во 17:30 на тренинг центарот „Петар Милошевски“ го има првиот тренинг од подготовките.

Додека пак репрезентативците до 21 година на Канатларовски во Скопје официјално ги започна подготовките во пресрет на силниот контролен турнир што ќе се одржи во Хрватска.

Покрај нашата селекција, учество ќе земат и репрезентациите на Албанија, Саудиска Арабија и домаќинот Хрватска. Место на одигрување на контролните натпреварите ќе биде Свети Мартин на Мура.

Селекторот на репрезентацијата до 21 година, Драги Канатларовски не го крие  задоволството што Македонија ќе има прилика да учествува на еден силен меѓународен турнир каде што учество ќе земат и квалитетни селекции како Хрватска, Албанија и Саудиска Арабија.

– „По консултациите со мојот тимот за одигрување на што поголем број контролни натпревари, се со цел што подобро да се подготвиме за квалификациите што не очекуваат во март, можам да изразам задоволство што ќе учествуваме на еден ваков силен турнир во Хрватска. Ова е наш втор собир, првиот собир на оваа генерација беше во јуни каде што одлично стартувавме, забележавме две победи над Бих. Се надевам дека во ист ритам ќе продолжиме, со квалитетна игра, голема пожртвуваност и желба за победа. Од натпревар во натпревар ќе се обидеме да ја подобриме нашата играта и да растеме и напредуваме заедно како тим. Вредно и напорно работиме, се трудиме сите заедно максимално на секој тренинг. Ме радува фактот што ги имаме сите играчи на располагање, во Хрватска ќе ни се придружи и Кристијан Тасевски. Оваа репрезентација поседува квалитет и знаење, се надевам дека ќе ја продолжиме победничката низа.”

Првиот натпревар го играме против Албанија на 23. септември. Три дена подооцна силите ќе ги одмериме со селекцијата на Саудиска Арабија.