Рурална Коалиција во соработка со Мрежата за рурален развој – Скопје, а со поддршка на општините Кичево, Македонски Брод и Пласница ја одржа првата заедничка работилница за изработка на стратегија за развој на руралните средини на териториите на трите општини, а како еден од основните пред-услови за регистрација на Локална Акциска Група која што ги вклучува сите чинители во заедницата (граѓани, здруженија, бизнис сектор, општини), а ќе делува на териториите на трите општини и ќе придонесува кон локалниот и рурален развој на истите преку директна соработка со локалното население.

Што всушност претставува формата Локална Акциска Група и ЛЕАДЕР пристапот?

Имено, ЛЕАДЕР пристапот претставува уникатна можност за заедничко остварување на руралниот развој преку локална поддршка. Постојат седум клучни карактеристики кои го сумираат ЛЕАДЕР пристапот : 1. Стратегија за локален развој заснована на територија; 2. Пристап “од долу нагоре” со моќ за одлучување на Локалните акциони групи во врска со изработувањето и спроведувањето на стратегиите за локален рурален развој, 3. Јавно – приватно партнерство : Локална акциона група (ЛАГ); Иновациски активности; 5. Повеќесекторски активности и спроведување на истите; 6. Вмрежување помеѓу Локалните акциони групи и 7. Спроведување на проекти за соработка. Овие карактеристики претставуваат една целина (сет на алатки) и секоја карактеристика е комплементарна и има позитивно взаемно дејство со другите карактеристики низ целиот процес на спроведување, со трајни ефекти врз динамичноста на руралните средини и нивниот капацитет да ги решат сопствените проблеми.

Она што исто така е клучно за функционалноста на овој пристап се финансиските средства кои што ќе следуваат за развој токму на овој пристап и за решавање на проблемите на локалното население. Имено, во нашата држава оваа мерка за развој ЛИДЕР пристапот се очекува да биде акредитирана во рамките на ИПАРД 3 програмата каде што се очекуваат 25 милиони евра кои што ќе бидат ставени на располагање на локалните акциски групи што пак ќе значи унапредување на локалниот економски и рурален развој согласно предлозите и потребите на локалното население кое што живее на територијата на трите општини.

Процесот на изработка на стратегијата за локален економски и рурален развој ќе трае до почетокот на месец април преку одржување на работилници и креирање на работни групи на териториите на трите општини кога се очекува локалните чинители да ги дефинираат стратешките приоритети и проекти на кои што ќе работат до 2027 година. По изработката на стратегијата следува процес и на регистрација на Локалната Акциска Група каде што трите општини ќе бидат дел и од основачите на оваа група која што најверојатно ќе го носи називот „Треска“ како заедничко обележје на трите општини.