Кризата со пандемијата од Ковид 19 трае
веќе цела година. Многу од навиките на граѓаните и начинот на живот драстично се променија, но кога станува збор за туризам и патување, потребите и желбите за тоа кај огромен процент од граѓаните останаа исти.

– Високи 72,5% и покрај сите случувања изминатиов период, сепак имаат желба и потреба и ако дозволат условите ќе одат на одмор.

Нашите пријатели од најголемата facebook туристичка група во Македонија “Патувања низ Македонија” направија анкета за тоа што мислат македонските граѓани за нивните годишни одмори претстојнава летна сезона, дали ќе патуваат и каде?

Во периодот од 2 до 10 април гласале вкупно 1.565 членови на оваа група. Резултатите од анкетата се следни:

📌 Високи 38,5% со нетрпение очекуваат да се отворат границите за Македонија и летните одмори да ги поминат на море.
Некои со потврда за вакцина, други со негативни ПЦР тестови, трети со потврда дека имаат прележано вирусот и имаат антитела, ќе ги искористат сите механизми на располагање и ќе уживаат на морските брегови.

📌 29% од испитаниците се изјасниле дека годишните одмори оваа летна сезона ќе ги поминат во туристичките центри во Македонија. Причините за изборот на Македонија како дестинација за одмор се повеќе. Дел поради тоа што сметаат дека не е соодветно време да се патува надвор од земјава, други поради тоа што се верни и го поддржуваат македонскиот туризам, трети пак поради оној финансискиот аспект т.е да поминат со некоја поевтина варијанта.

📌 5% од македонските граѓани се изјасниле дека ќе прават комбинација од одморот, ќе патуваат и во туристичките центри во Македонија, но и надвор.
Така, 2,6% се изјасниле дека ќе летуваат во Македонија, но и еден викенд би заминале на море.
2,4% одморот ќе го поминат надвор од Македонија, но еден викенд би искористиле и во македонските туристички центри.

📌 27,5% од испитаниците се изјасниле дека сепак нема да одат на одмор никаде. Еден дел од нив поради егзистенцијални причини, дел поради ситуацијата со пандемијата, и дека сѐ уште не е време за патување.