Спорт
Доаѓа „ВАР“ системот во македонската фудбалска лига, ќе започнат едукации на судии и арбитри, стадионите мора да добијат посебна подготовка за „ВАР“ собите

Фудбалската федерација на Македонија (ФФМ) преку веќе формираниот проектен тим за имплементација на ВАР системот започна со реализација на активностите поврзани со системот за помош на судиите преку видео-технологија.
ВАР системот во македонската фудбалска лига (МФЛ) треба да започне да се употребува од почетокот на следната натпреварувачка сезона 2025/26. Фудбалската федерација на Македонија веќе ги извести УЕФА и ФИФА за отпочнувањето на имплементациските активности во ФФМ.
Дејан Јакимовски – проектен лидер за имплементација на ВАР:
– „Одржавме првичен on-line состанок со ФИФА и веќе дефиниравме дел од важните постапки за имплементација на ВАР системот во МФЛ. Според првичниот план и динамиката на активности, планирано е да започнеме со употреба на видео-технологијата од следната натпреварувачка сезона. Прва МФЛ, Куп на Македонија (од 1/4 финална фаза), Куп на Македонија (финале – жени) и бараж натпревари за Прва МФЛ се натпреварувањата кои ќе бидат опфатени.
– Ветувањата на новото раководство на ФФМ започнуваат со имплементација на „ВАР“ системот кој ќе биде значаен чекор кон подобрување на правичноста и транспарентноста во носењето на судиските одлуки на натпреварите и зајакнување на духот на фер-плејот.
Повеќе ќе прочитате на официјалниот натпис на Фудбалската федерација на Македонија – ТУКА
Спорт
Новак Ѓоковиќ го победи Корентин Муте во третото коло на „Ролан Гарос“

Новак Ѓоковиќ обезбеди место во третото коло на Ролан Гарос со сигурна победа против домашниот играч Корентен Муте, совладувајќи го во три сета – 6:3, 6:2, 7:6 (7:1). Иако натпреварот почна со мали осцилации, српскиот ас брзо го презеде водството и најголем дел од мечот го имаше под контрола.
Во првиот сет, иако го загуби својот сервис рано, Ѓоковиќ веднаш возврати со рибрејк и до 2:2 играта беше израмнета. Потоа тој забрза темпо, освои четири од следните пет гема и без многу проблеми го освои сетот. Неговата прецизност, стабилната одбрана и разновидноста во ударите беа пресудни во овој дел од мечот.
Во вториот сет, Ѓоковиќ уште повеќе ја зацврсти својата игра. Направи рано брејк и брзо поведе со 5:2. Иако Муте се обиде да ја задржи борбеноста, неговите бројни грешки и одличната тактика на Новак му донесоа нов сет без голема драма.
Третиот сет беше далеку понеизвесен. Французинот, охрабрен од домашната публика, заигра поангажирано и во еден момент дури дојде до предност од 4:2. Ѓоковиќ, и покрај проблемот со левото стапало кој го натера да побара медицински тајм-аут, успеа веднаш да се врати во игра со брејк без загубен поен.
До крајот на сетот се водеше голема борба. Муте имаше моменти на инспирација и ја крена публиката со неколку спектакуларни потези, но Новак остана ментално силен и стабилен во клучните моменти. Во тајбрејкот покажа зошто е еден од најголемите – играше беспрекорно и го освои со убедливи 7:1.
Со оваа победа, Ѓоковиќ уште еднаш докажа дека знае како да се справи со притисокот, дури и кога не е на 100% физички.
Следен противник ќе му биде или Шаповалов или Мишолиќ, а според сè што покажува, неговата форма оди во нагорна линија како што турнирот се одвива.
Спорт
Да ја бодриме Македонија! Од денес на продажба тикети за мечот Македонија – Белгија закажан за петок

Од денес со почеток во 18:30 часот, започнува продажбата на билети за натпреварот помеѓу Македонија и Белгија, кој ќе се одигра на 6 јуни во 20:45 часот на Националната арена „Тодор Проески“ во Скопје, како дел од квалификациите за Светското првенство 2026.
Билетите, како што известуваат од ФФМ ќе бидат достапни по цени од 300, 400 и 500 денари, а сите фанови и поддржувачи на македонската репрезентација можат да ги набават преку интернет платформата:
Процедурата за купување е едноставна:
- Посетете ја веб-страницата https://eticket.ffm.mk/
- Изберете го натпреварот
- Одберете го вашето место
- Направете уплата
- Преземете го дигиталниот билет
Ајде за Македонија! Повик до сите љубители на фудбалот да присуствуваат со спортски дух и коректно навивање да ја поддржат нашата репрезентација во борбата за позитивен резултат против една од најсилните селекции во светот.
Напред МАКЕДОНИЈА! 🇲🇰
Спорт
Македонската фудбалска репрезентација до 21 година одигра нерешено со Косово во гости

Македонската фудбалска репрезентација до 21 година одигра натпревар без голови против Косово, на првиот контролен меч меѓу овие две селекции, кој се одигра на стадионот „Фадил Вокри“ во Приштина.
Мечот беше борбен и неизвесен до самиот крај, со многу трчање и тактички дуели на теренот. Обете екипи имаа свои шанси, но не успеаја да ги реализираат.
Најблиску до погодок беше Димитар Трајков во 36. минута, но неговиот удар со глава заврши над голот. Пред крајот на првото полувреме, Меметриза Хамза се обиде со удар од далечина, но домашниот голман сигурно интервенираше.
Во второто полувреме, Трајков повторно се најде во добра позиција во 62. минута, но не успеа да погоди. Адриан Зенделовски во 80. минута имаше своја шанса, но ударот му беше блокиран. Неколку минути подоцна, Анес Мелиќи се закани со удар со глава, но беше непрецизен.
За Македонија настапија: Васко Василев, Ѓорге Џеков, Матеј Ангелов, Адриан Зенделовски (Никола Манојлов), Мартин Ѓоргиевски, Димитар Трајков (Матеј Гаштаров), Давид Даилоски, Нуман Ајетовиќ, Меметриза Хамза (Кире Стојанов), Димитар Данев, Анес Мелиќи
Селектор: Горан Станиќ
-
Хороскоп1 ден
Хороскоп за четврток (29 мај)
-
Кичево17 часа
Во сабота на Китино Кале, „Биди нејзиниот глас“, настан наменет за превенција на домашното насилство и зајакнување на жените во организација на „Саншајн Кидс“
-
Хороскоп7 часа
Хороскоп за петок (30 мај)
-
Временска прогноза2 дена
Доаѓа прилив на Африкански бран кој ги носи посакуваните летни температури
-
Кичево17 часа
Кичевчани денеска по четврт пат ќе протестираат пред општинската зграда поради градската депонија, бараат решавање на долгогодишниот проблем
-
Македонија1 ден
Директорот на БЈБ Јанев во посета на СВР Охрид, ОВР Струга, ПО во с.Велешта и ПС за ГП аеродром „Св.Апостол Павле“
-
Спорт2 дена
Милевски го соопшти списокот на повикани фудбалери за квалификациските мечеви против Белгија и Казахстан
-
Македонија2 дена
На старица од Прилеп и украле златно ланче, експресно биле фатени од Полицијата