Вчера (31.10.2024), полициски службеници од Отсекот за превенција при СВР Охрид и од Полициската станица Кичево, на подрачјето на кичевските села Бигор Доленци, Карбуница и Староец ја реализираа сообраќајно едукативната кампања „Безбедно возење трактори и земјоделски машини“.

Целта на кампањата е низ непосредна комуникација со возачите на трактори со тракторски приколки и други работни приклучни земјоделски мобилни машини кои, во овој период ги користат земјоделците, да им се укаже на потребата од внимателно и совесно возење, како и строго почитување на сообраќајните знаци и другите сообраќајни правила и прописи со цел, зголемена сообраќајна безбедност.

На возачите им беа поделени летоци со едукативни практични совети за одговорно учество во сообраќајот, придржување кон поставените сообраќајните знаци, како предуслов за избегнување на сообраќајни незгоди, со казнените одредби при кршење на Законот за безбедност во сообраќајот на патиштата, а им беа поделени и самолепливи флуоресцентни ленти и светла за означување на тракторите и земјоделските машини.

Кампањата се спроведува со поддршка на Републичкиот совет за безбедност во сообраќајот на патиштата, за Порта.мк известува портпаролот на СВР Охрид, Стефан Димоски.