Денеска во касарната „Чеде Филиповски – Даме” во Кичево, се реализира свечена церемонија за испраќање на единица од Армијата на вежбата „КФОР 30″ во Хохенфелс, каде на истата присуствуваше заменик министерот за одбрана – Башким Хасани, заедно со државниот секретар Драган Николиќ, директорот на Генералштабот, генерал мајор Зоран Милески и командантот на 1. бригада, полковник Сашко Лафчиски.

– Да бидете упорни и мотивирани и да покажете дека нашата Армија е составена од вистински професионалци. Овие подготовки и нашето учество во мисијата на НАТО на Косово се пример за нашата посветеност кон регионот, неговата безбедност, стабилност и просперитет. Тоа е приоритет за НАТО, тоа е и наш приоритет како земја-членка”, пред присутните истакна Хасани.

Меѓународната вежба ќе биде со времетраење до крајот на месецов и истата е во организација на Американските сили во Европа, а нашата Македонска Армија ќе учествува со чета од 140 припадници. Предвеидени се да изведат вежбовни активности заедно со припадници од армиите на САД, Италија, Романија, Албанија, Молдавија Латвија, Косово, Словенија и СР Германија.

Како што се наведува во текстот, целта на вежбата „КФОР 30“ е подготовка на единиците кои се упатуваат во мисијата КФОР на Косово, во поддршка на мирот, стабилноста и безбедноста и поддршка на цивилните авторитети на Косово.

На оваа вежба нашите припадници заедно со останатите припадници од другите земји ќе работат на унифицирање на подготовката на персоналот во ротациите во мисијата КФОР, односно ќе работат на подигнување на интероперабилноста со партнерските сили, стандардизирање на процедурите и постапките.

ФОТО: Facebook/Министерство за Одбрана