ДБР – група е промотерска мултимедијална организација која е присутна на сцената од 1998 година. Група на уметници кои потекнуваат од Кичево, Македонија.
Инспирирани од сопствениот град, сивилото на улицата, но и желбата да се држи чекор со модерните електронски текови, креираат и придонесуваат во развојот на електронската сцена, клубскиот начин на живот, уметност и култура.

ДБР – група, позади себе има реализирано многу музички настани, радио емисии, музички изданија како и многу љубов за прогресот на современата музика и клубското живеење. Денес сме горди на она што останува како печат во нашиот мал град. За онаа оставена трага на различни генерации, од високите октави на вокалите од некогашните почетоци во Детроит, па се до денешните софистицирани експериментални мелодии во Берлин и насекаде во светот.

Позитивната енергија и упорноста, што ја добиваме од верната публика е мотивот и моторот што трпеливо ги турка ДБР напред. Тоа се луѓето кои заслужуваат слобода на изразување, без предрасуди, комплекси и бариери, наметнати од “фејк” општествените норми.

DJ SET: Martin Looper / Andreja Salpe / Martina Paneva / Robotnix / Dimitry DBR / Spectromanski / Dimitr / Milan / Ultimusa

Ние сме група на луѓе кои се отворени за соработка и промовирање на артисти, уметници и за сите оние кои сакаат да се изразат себеси, онака како што тие сметаат дека треба.

Нашата цел е да им дадеме поинаква опција на младите луѓе. Енергија, дух, визија. Наспроти пропагандата на квази промоторите, креаторите на кичот и искривените вредности во општеството.

– Што се однесува до времето, 25 години се доволни да се разбере пораката која ја испраќаме трпеливо: „Развивање на културниот плурализам, надминување на предрасудите и разликите во општествените групи, афирмација на културните вредности, сфатени како еднакви и неоттуѓиви права и слободи на секоја индивидуа“.  Затоа што електронската сцена не е само музика, тоа е начин на живот.

За таа цел, на 05 август (сабота), љубителите на електронските звуци ќе доживеат уште едно музичко издание во организација на ДБР – група.

Настанот започнува од 15:00ч па се до крајот на денот на добро познатата локација клуб Република – 96 259 Кичево

Ајде сите заедно да испратиме порака за Љубовта преку универзалниот јазик кој сите го разбираме-музиката. Слободата мора да биде сакана, а љубовта треба да биде слободна.

25 години – позитивна енергија, напишаа во интегралното соопштение, за кое ние даваме безрезервна поддршка и Ве повикуваме заедно да присуствувате на овој настан!