„Google Wallet“ добива нова функција која им овозможува на корисниците поедноставно користење на нивните дигитални пропусници, картички за лојалност, билети за настани или пропусници за јавен превоз. Сега секој корисник може да додаде прекар на своите дигитални картички, што го олеснува нивното препознавање.

Функцијата, која првично беше најавена во април, сега е достапна за сите. За да се додаде прекар, треба да се отвори избраната картичка, да се допре иконата со три точки во горниот десен агол и да се избере опцијата „Додај прекар“. Прекарот може да има до 25 знаци и се прикажува под главниот наслов на картичката, што особено помага кога имате повеќе картички од истата продавница или транспортна мрежа.

Со овој чекор, „Google Wallet“ полека се трансформира од едноставен дигитален паричник во практична апликација за организација на секојдневните задачи.

Повеќе паметни функции за поедноставен секојдневен живот

Оваа новина е дел од низата корисни функции што „Wallet“ ги воведе оваа година. Една од нив е „Сè друго“ – опција што дозволува да се претвори било кој физички документ во дигитална пропусница со едноставно фотографирање. Со помош на вештачка интелигенција, „Google“ ги препознава деталите од сликата и автоматски создава дигитална верзија. Засега, оваа опција е достапна само во САД.

„Wallet “исто така ја подобри систематизацијата на известувањата. Новата функција „Nearby Passes“ ги известува корисниците кога се во близина на место каде можат да искористат една од своите зачувани картички, како продавници или настани. Со еден допир, картичката се отвора на екранот, што ја прави апликацијата поинтуитивна и побрза за користење.

Поддршка и за програмерите

За развивачите, Google воведе нови опции: картичките добиени преку Gmail можат автоматски да се додадат во „Wallet“ доколку се овозможени Smart функциите, а трговците кои користат Smart Tap можат веднаш да ги поканат корисниците да се приклучат на нивната програма за лојалност по завршување на купувањето.

Сите овие промени ја нагласуваат трансформацијата на „Google Wallet“ од обичен дигитален паричник во централно место за управување со картички, пропусници и билети, со паметни функции кои го олеснуваат секојдневниот живот и заштедуваат време.

/androidpolice

Instagram започна тестирање на нов изглед на својата апликација, кој веќе е достапен за дел од корисниците. Промената засега е опционална, но се спроведува во согласност со новите приоритети на компанијата Meta, која е сопственик на платформата.

Новата лента со менија во апликацијата има изменет распоред на табовите и донесува посебни јазичиња за Reels и директни пораки (DM) — две од најпопуларните функции на Instagram. Целта на ова редизајнирање е да се олесни пристапот до функциите што корисниците ги користат најчесто и да се направи искуството поинтуитивно.

Според информациите, оние што се вклучени во тестирањето ќе забележат дека досегашните табови — Home (фид), Search (пребарување), Create (нова објава), Reels и Profile (профил) — се заменети со нов распоред. Наместо досегашното копче за пребарување и Reels, се додаваат нови табови за Reels и DM, а копчето за создавање објава добива нова позиција. Дополнително, новиот дизајн овозможува лизгање меѓу табовите, што го прави навигацискиот дел уште пофлуиден.

Шефот на Instagram, Адам Мосери, изјави дека корисниците ќе имаат можност сами да изберат дали сакаат да го активираат новиот изглед или да останат на стариот. Тој додаде дека е потребно извесно време за публиката да се навикне на редизајнот, па затоа променава ќе се воведува постепено, со цел да се соберат повратни информации и да се направат дополнителни подобрувања.

Instagram продолжува со постојани тестирања на нови визуелни и функционални решенија, а ова ажурирање е дел од стратегијата на Meta за подобрување на корисничкото искуство и интерактивноста во апликацијата.

Извор: PCPress

OpenAI претстави нов начин за програмерите да креираат и извршуваат апликации директно во рамките на ChatGPT. Со оваа новина, корисниците ќе можат да пристапат до интерактивни апликации како Booking.com, Expedia, Spotify, Figma, Coursera, Zillow и Canva – без да ја напуштат платформата.

Покрај тоа, OpenAI го претстави и Apps SDK, алатка наменета за програмери, со која тие ќе можат да создаваат сопствени апликации што функционираат во ChatGPT.

Целта на компанијата е да изгради екосистем од апликации околу својот водечки производ за вештачка интелигенција. Ова лансирање доаѓа по претходниот обид на OpenAI да им овозможи на програмерите да креираат интерактивни GPT-апликации преку посебна продавница. За разлика од тој модел, новиот систем овозможува апликациите да бидат директно интегрирани во разговорите, со што корисниците можат да повикуваат алатки од трети страни во реално време.

На овој начин, се создаваат подобри услови за програмерите при дистрибуцијата на нивните апликации, а корисниците добиваат побогато и поинтерактивно искуство во ChatGPT.

Платформата ќе прикажува релевантни апликации кога тие се корисни за барањето на корисникот. На пример, ако некој побара листа за репродукција за забава, ChatGPT може автоматски да ја повика апликацијата Spotify во разговорот. OpenAI најавува дека во иднина ќе бидат достапни и апликации како Uber, AllTrails, Instacart и DoorDash.

Новиот систем е изграден врз основа на Model Context Protocol (MCP), кој им овозможува на програмерите да ги поврзат своите извори на податоци со системот на вештачка интелигенција. Благодарение на тоа, ChatGPT-апликациите ќе можат да обработуваат податоци, да прикажуваат интерактивни интерфејси и дури да репродуцираат видеа во рамките на разговорот, кои ќе се менуваат според потребите на корисникот.

OpenAI најави дека новите функции ќе бидат достапни за корисниците ширум светот во наредниот период.

Извор: techcrunch