Со радост го споделуваме ова возвишено видео, кое ги доловува светите моменти од прославата во Манастирот Пречиста Кичевска, при монашењето на сестра Текла, на празникот Рождество на Пресвета Богородица (20/21 септември 2024). Овој духовен настан, исполнет со небесна благодат, го означи почетокот на новиот живот на сестра Текла во Христа, посветувајќи го своето битие на монашкиот пат.

Видеото содржи величествени кадри од манастирската слава и светиот чин на монашењето, умешно монтирано од Александар Пауновски, кој истовремено е и главен снимател на видеото. Во снимањето учествуваше и Дарко Цветаноски, чии дополнителни кадри ја збогатуваат атмосферата, а воздушните снимки се дело на Никола Наумовски, кој користеше дрон за да ги прикаже манастирот и неговата околина од височина. Музичката придружба е дело на Петар Христов, кој свири на критска лира и кларинет, со клавирска поддршка од Симон Облешевски, додека музичката продукција и обработката беа реализирани од Горан Трајковски – Готра.

Фотографите на овој значаен настан беа Давор од Порта.мк, Дарко Цветаноски, Никола Наумовски, Томе Љушев и Јован Ангелески, кои со своите фотографии дополнително ја доловија атмосферата и убавината на монашкиот чин. Нивните фотографии, заедно со видеото, ги пренесуваат најдлабоките моменти на радост и духовност што ги доживеа монашката заедница и присутните верници.

Во целото видео се чувствува тивка радост и духовен мир, додека сестра Текла, под духовното раководство на својот отец, епископот г. Партениј, ги положува заветите и го добива светото име на првата маченичка и рамноапостолна света Текла. Монашкиот постриг беше извршен од пастирските раце на Високопреосвештениот Митрополит Дебарско-кичевски г. Тимотеј, кој со својата благодат ја воведе сестра Текла во монашкиот живот, благословувајќи го нејзиниот нов духовен пат.

Погледнете го целосното видео тука: Монашење во Пречиста – монахиња Текла

Ве повикуваме да бидете сведоци на овој благословен момент, кој сведочи за живата традиција на православното монаштво, каде љубовта, смирението и посветеноста кон Бога го водат верниот народ. Нека патот на сестра Текла во служба на Христа биде инспирација и светлина за сите кои ја бараат вистинската смисла на христијанскиот живот.

Кредити за продукцијата:
🎬Видео монтажа: Александар Пауновски
📽️ Видео: Александар Пауновски, Дарко Цветански
🚁 Дрон: Никола Наумовски
⛪ Продукција: Бигорски Манастир
🎼 Музика: Петар Христов
🎺 Критска лира: Петар Христов
🎹 Клавир: Симон Облешевски
🎚️ Музичко студио и обработка: Горан Трајковски – Готра

Не го пропуштајте ова духовно сведоштво за верата и посветеноста!

Започнувајќи со традиционалната празнична богослужба вчера вечер и денес на утро се разбира, кичевскиот манастир „Св.Богородица – Пречиста“ беше посетен од голем број на верници на денешниот патрон празник Рождество на Мајката Божја.

Исто така вчерашниот ден беше посебен бидејќи една од искушеничките се замонаши и го доби своето монашко име „Текла“, додека денес Манастирскиот кум Дејан Сарафилоски послужи манастирски ручек и изврши примопредавање на кумството на новиот кум, г-дин Цане Ѓорѓијоски.

Во прилог мал дел фотографии преку нашиот објектив, кои ги одбележаа овие празнични денови, додека повеќе од прекрасниот настан ќе најдете на официјалниот натпис на Бигорскиот Манастир ТУКА и на официјалната страница од Свештена Пречистанска Обител „Благовештение на Пресвета Богородица“

За многу години!

Нема сомнение дека монаштвото е една највеличествена света тајна во Црквата Божја. Во една прилика, нашиот Старец, Епископот г. Партениј ќе каже дека „тоа е бесценет дар од Бога, патека кон преобразување на човечкото срце и обожение. Монахот е оној кој ја оставил земната суета и се затворил во прегратките на Христовата љубов, барајќи да ја исполни Божјата волја со целото свое битие. Монаштвото е мистичен подвиг, каде што преку блаженото послушание умот се ослободува од светските грижи, а душата се води кон непрестајна молитва и соединување со Бога. Животот на монахот е непрестајна борба со страстите, фронтално соочување со силите на Адот, но истовремено и сладост на небесната благодат. Монахот го зема на себе Крстот Христов, со секој здив Го исповеда Бога и Му ја принесува својата љубов, посветувајќи се целосно на Црквата и на спасението на светот. Монашкиот живот е тајна на тишината, каде што зборовите се малку, но молитвата непрестајна; живот во послушание, во смирение и во духовна радост, исполнет со славословие кон Бога“ (Беседа на монашки синаксис).

И ете, токму по тој благодатен пат на самоодрекување и на духовна радост, вчеравечер зачекорија тројца нови монаси на Христа, духовни рожби на бигорскиот отец на отците, Старецот наш свет и возљубен, Преосвештениот Епископ Антаниски г. Партениј. Имено, според нашата стара манастирска пракса, во навечерието на празникот Усекновение на Чесниот Претеча и Крстител Јован, на Вечерната богослужба, нашиот драг монахољубив пименарх, Високопреосвештениот Митрополит Дебарско-кичевски г. Тимотеј, со своите татковски пастирски раце го изврши свештениот чин на монашки постриг на нашите браќа: Јајка Силккола од Куопио, Финска, Деан Божинов од Радовиш и Оливер Марковски од Куманово, кои доброволно го понесоа на себе крстот на самозаборав заради Христа и ги положија пред земската и небесната Црква вечните завети за доброволно послушание, нестекнување и целомудрие, добивајќи ги новите монашки имиња: Елисеј, Пантелејмон и Евстатиј, соодветно.

Во мигот додека нашите нови браќа, закрилувани од духовниот татковски плашт на дедо Старец и поткрепувани од неговите молитвени солзи, се облекуваа во монашките знаменија и облека, во Претечевиот преполн храм се чувствуваше почетокот на едно ново раѓање, во светлината на празникот и на величината на Свети Јован Крстител, духовниот прототип и патеводител на сите монаси. Оти, бездруго, нашиот најмил и најсакан Покровител, Претечата на Господа, е првиот монах и небесен заштитник на монаштвото, оној кој со својот живот го воспостави образецот на духовниот подвиг и на светоста. Со своето повлекување во пустината, каде што срцето му беше постојано обземено од присуството на Бога, Свети Јован ја отвори патеката за оние кои ќе го следат патот на монашкото откажување и аскеза. Тој е симбол на длабокото покајание, на непрестајната молитва и на крајното смирение – жив сведок за тоа како душата може да стане чист сад за Божјата благодат. Неговиот глас во пустината не беше само за неговото време – тој и денес одекнува во срцата на оние кои се стремат кон внатрешната тишина и кон преобразувачката сила на Божествената љубов. Како заштитник на монасите, Свети Јован ги води оние што Го љубат Бога да ја изберат пустината на срцето, каде што секоја мисла и желба се сведуваат на едно: да се израмни патот Господов, да се исчисти внатрешниот човек и да се стане достоен за Неговото повторно доаѓање.

Сведоци на испишувањето на оваа духовна и свештена историја на Бигорската Обител, освен ангелите и светиите Божји, вчеравечер беа и многубројните поклоници на Чесниот Претеча, меѓу кои и нашите драги отци и браќа, Архимандритите Матеј и Херувим, како и отците Теона и Кирил од Црквата на Грција и јерејот Петар од православната Црквата на Романија. Посебен украс на оваа наша манастирска слава беше молитвено и небесно пеење на отец Херувим со неговиот ангелогласен хор, кои ги воздигнаа нашите мисли и чувства во поинаква духовна димензија.

Исклучителен дар за сите нас и посебно за новите браќа монаси, беше длабоката монашка поука од нашиот свет архипастир, Митрополитот г. Тимотеј, срочена во неговата пригодна беседа по чинот на монашењето.

Нека ви е благословено новото духовно раѓање, наши мили браќа, во рамноангелскиот монашкиот чин! Нека вашите срца бидат секогаш смирени и отворени за послушанието кон Старецот наш свет, преку кого ќе се водите кон непрестајната светлина на Христовата убавина. Со крстот на послушанието, смирението и љубовта, да чекорите по патеката на обожението, та да го достигнете небесниот мир и да се соедините со Христа во Неговото вечно Царство. Светиот Јован Крстител, нашиот моќен Патрон, прв монах и патеводител, нека ви биде постојана инспирација и заштита во духовната борба. Молитвите на Митрополитот, на Старецот, на нашата света монашка заедница и на сите свети да бидат со вас на секој чекор!

Повеќе фотографии ќе најдете ТУКА