За време на претстојниот викенд и периодот кој следи, Државниот пазараен инспекторат ќе врши редовни и вонредни надзори низ цела територија на Македонија кај трговци и угостители врз основа на повеќе закони во рамки на своите надлежности.

При надзорите ќе се даде посебно внимание на „Black Friday“ – продажните акции, се со цел спречување на доведување во заблуда на потрошувачите и примена на измамнички трговски дејства, во согласност со Законот за заштита на потрошувачите.

Дополнително, имајќи го предвид зимскиот период, но и поплаките од граѓаните кои пристигнуваат во континуитет во пазарниот инспекторат за пушење во угостителските објекти, ќе се вршат надзори и по Законот за заштита од пушењето.

Како што се наведува во соопштението, Пазарниот инспекторат при надзорите ќе опфати поширок обем на закони за постапување, како што се:

• Законот за заштита на потрошувачите
• Законот за трговија
• Законот за заштита од пушењето
• Законот за угостителска дејност
• Законот за забрана и спречување на вршење на нерегистрирана дејност
• Закон за инспекциски надзор
• Закон за државен пазарен инспекторат

Преку медиумите, ДПИ апелира до сите трговци и угостители, да ги почитуваат законите, а своите дејности и услуги да ги вршат во согласност со законските прописи.

– Исто така, ги охрабруваат граѓаните, секоја неправилност која ќе ја забележат да ја пријават во Државниот пазарен инспекторат на 191 или на www.dpi.gov.mk