Вчера 23.04.2025 г. во просториите на општина Кичево се одржа работен состанок на општински кризен штаб за превенција и заштита од пожари на отворен простор.

Целта на состанокот беше дефинирање на мерките и надлежностите на институциите за поголема и поефикасна заштита од пожари во шуми и на отворен простор, ефективна координација со навремено реагирање при појава на пожари, методи за превенција како најефикасна заштита од појава на пожари кои сериозно можат да го загрозат шумското богатсво и да предизвикаат повреди и жртви.

– На состанокот, покрај полициски службеници од ОВР Кичево, присуствуваа претставници на Центарот за управување со кризи, на службите во локалната самоуправа,на јавните претпријатија, Територијалната противпожарна единица, Министерство за Одбрана, Дирекцијата за заштита и спасување, ЈП „Македонски шуми“, доброволни противпожарни друштва, невладини организации и медиуми – за Порта.мк известува портпаролот на СВР Охрид, Стефан Димоски

Исполнети со радоста од славното Христово Воскресение, во овие светли денови ја предвкусуваме вечната радост кон која се стремиме, живеејќи во светлината на Пасхата. Во оваа Воскресна пролет, кога сè околу нас се облекува во бел цветен украс, ни претстои празнување на споменот на Живоносниот Источник на Пресвета Богородица – нашата Царица Небесна.

По тој повод, на 25 април (петок), во нашата света обител Манастир Пресвета Богородица Пречиста ќе се одржи Пасхално богослужбено торжество со следниот распоред:

08:00 – Утрена богослужба
08:30 – Пречек на Владиката
09:00 – Архиерејска Литургија проследена со торжествена литија до местото „Господинец“

На богослуженијата, за наша голема радост ќе претстои нашиот возљубен старец, Епископот Антаниски г. Партениј, кој ќе го излее својот благослов врз сите присутни. Особена чест ни е и присуството на монашките заедници од Бигорската, Рајчичката и Кнежинската обител.

Преку нашиот медиум, секако проследени и од нас ги покануваме сите оние што сакаат заедно со нас да ја споделат оваа пасхална радост во молитвено единство.

Христос Воскресе!

На 21.04.2025 во 15.30 часот, на магистралниот пат Кичево-Охрид, кај планинскиот превој „Пресека“, се случила сообраќајна несреќа помеѓу патничко моторно возило „киа“ со скопски регистарски ознаки, управувано од К.Ф.К.Л.(53) од Франција и „шкода“ со кумановски регистарски ознаки, управувано од А.К.(42) од Куманово.

Во несреќата, возачот на возило „киа“ и сопатничката К.К.А.Е. (19) од Франција се здобиле со тешки телесни повреди, додека возачот на возилото „шкода“ и сопатниците С.К.(36) и две малолетни лица, сите од Куманово, се здобиле со телесни повреди, констатирани во болницата „Св.Еразмо“ во Охрид.

Увид на местото на несреќата извршила екипа од ОВР Кичево, информира портпаролот на СВР Охрид, Стефан Димоски.