ЈП „Комуналец“ – Кичево ги известува сите корисници на вода за пиење дека ќе има прекин во снабдувањето, поради дефект на главната водоводна цевка на ЈП „Студенчица“, која го снабдува со вода КХЕ „Осломеј“ и околните села, од денес, сабота 19.07.2025, ќе има прекин во водоснабдувањето до целосно отстранување на дефектот.

Без вода за пиење ќе останат следните села: Гарани, Шутово, Премка, Црвивци, Србица, Аранѓел, Поповјани, Јагол, Колибари и Длапкиндол.

Екипите на КХЕ „Осломеј“, ЈП „Студенчица“ и ЈП „Комуналец“ се на терен и работат на што побрзо санирање на дефектот, стои во соопштението за јавноста на ЈП „Комуналец“ – Кичево.

Извор: ЈП „Комуналец“ – Кичево

Вчера 18.07.2025 година во 09:05 часот, на крстосницата меѓу локален пат кај кичевското село Зајас и магистралниот пат Кичево-Гостивар, случена е сообраќајна незгода во која, патничко возило „Ауди“ управувано од А.С. (28) од кичевското село Колибари, удрило во пешакот Р.А. (38) од Зајас.

Таа со возило на Итната медицинска помош е пренесена во Општата болница во Кичево каде се констатирани тешки телесни повреди.

Увид на местото на незгодата извршија полициски екипи од ОВР Кичево, за јавноста соопшти портпаролот на СВР Охрид, Стефан Димоски.

Денеска (18.07.2025) околу 14 часот на патот Охрид-Кичево полициски службеници од ОВР Кичево го лишија од слобода Б.К.(48) од Скопје, затоа што управувал патничко моторно возило “тојота” со скопски регистарски ознаки, под дејство на алкохол.

Имено, по претходно добиена пријава на телефонскиот број 112 дека едно возило се движи неконтролирано по патот, преземени се соодветни мерки од страна на полициските службеници и возилото е запрено, а со тоа спречена е евентуална сообраќајна незгода која би можела да има тешки последици.

Притоа, било утврдено дека возачот е во полусвесна состојба и веднаш со возило на Итна медицинска помош бил пренесен во Медицинскиот центар во Кичево.
Откако му била пружена лекарска помош и неговата здравствена состојба значително била подобрена, извршено е алкотестирање, при што било утврдено дека имал 3,15 промили алкохол во крвта, при што лицето било лишено од слобода.

По целосно документирање на случајот, против Б.К. ќе биде поднесена кривична пријава по член 297-а од Кривичниот законик “безобѕирно управување со моторно возило”, информира МВР.