Денес 25.10.2023 со почеток од 12:00ч во „Хотел Кичево“ – „Рурална Коалиција“ организира јавна дебата „Како до одржлива и отпорна локална заедница во услови на криза“. Дали општините направија доволно, дали ни е доволно земјоделското производство, дали субвенциите беа доволни и правилно насочени, што се случуваше со локалниот бизнис сектор ќе бидат само дел од прашањата на кои што ќе се обидеме да дадеме одговор на дебатата, но и да дефинираме препораки кои што во иднина треба да го зголемат отпорот кон идните кризи на локалните заедници, но и да ги направат поодржливи, велат во соопштението за јавноста од „Рурална Коалиција“

– Општините одвоиле само 5% од нивните годишни буџети во текот на 2022 и 2023 година за да се справат со последиците од енергетската, економската и кризата со храна. Мерките и програмите кај најголем дел од општините: Штип, Прилеп, Битола, Кичево, Пласница, Ресен, Охрид остануваат идентични во 2022 и 2023 година, а најмногу се вложува во надминувањето на енергетската криза која што и најмногу ги зафати општините со високите сметки за струја во текот на зимата 2022 година.

Позначаен одговор на енергетската криза дава општина Пласница која што во 2022 година речиси и да немала предвидено буџет за енергетска ефикасност, но затоа пак во 2023 година предвидува цели 1.200.000 денари за реконструкција на јавни објекти во енергетски ефикасни, како и во градење на водоводна мрежа, што пак во проценти зафаќа дури 37,25% од вкупниот буџет на општината. Општина Охрид исто така најмногу од антикризниот буџет, односно дури 99% вложува во справувањето со енергетската криза, додека пак кога говориме за кризата со храна и социјалната заштита тука општините имаат издвоено најмалку односно 5-6% освен Битола и Ресен со повеќе од 15% и Прилеп со 11.7%

Она што пак е интересно да се спомене е дека од анализираните општини во Југозападниот плански регион единствено само општина Охрид воведува специфични мерки како субвенционирање на сметките за комунални услуги, но и субвенционирање на услугите во руралните средини што пак е насочено кон унапредување на развојот на руралните средини и зголемување на производството на храна на локално ниво.

За справување со кризите општините имаат направено по минимум 2 ребаланси на буџетите со што најмногу се крати од капиталните инвестиции кое што е најизразено во општина Кичево од дури 30%. Најмногу последиците од кризата се чувствуваат во секторот земјоделство и градежништво каде што зголемувањето на трошоците на репроматеријалите и суровините оди дури и до 50% кои што пак зголемувања се вметнуваат во крајните производи, а тоа е и една од причините зошто сите јадеме поскапа храна.

Повеќе одговори и дискусија околу проблемите на јавната дебата, инаку, јавната дебата е организирана како дел од проектот „Мониторинг, оценка и предлози за антикризни мерки во услови на тесен буџет“, поддржан од Владата на Швајцарија преку „Цивика Мобилитас“ информираат од „Рурална Коалиција“