Репрезентацијата на Македонија до 21 година доживеа убедлив пораз од Холандија со 5:0 на гостински терен во натпревар од квалификациите за пласман на ЕП 2025 година. Холандија во Алмере ја демонстрираше својата сила, во секој сегмент од мечот ја надигра нашата репрезентација и на крајот забележа убедлива победа.

Регир уште во втората минута го отвори резултатот по една одлична акција, а Охио во 22.минута зголеми на 2-0. Во продолжението Холанѓаните постигнаа уште три гола. Милион Манхоф во 61. и во 69.минута најави дебакл, а серијата ја заокружи Јури Регир исто така со својот втор гол во 75.минута од мечот.

Следниот меч од квалификациите го играме против Гибралтар на гостински терен, известуваат од ФФМ.

Македонската репрезентација утре на 7. и 10. септември ќе се соочи со Фарски Острови, односно Ерменија во Скопје, во рамки од новата сезона во Лигата на нации. Дебитантот во најдобрата македонска репрезентација, Кристијан Трапановски размислува оптимистички во пресрет на првиот гостински меч против Фарски Острови.

„Задоволство ми е што сум дел од националниот тим на Македонија. Се надевам дека ќе ја искористам оваа шанса и ќе ги покажам моите квалитети. Групата ме пречека одлично, се чувствувам супер, се чувствувам како долго време да сум тука иако ми е првпат“, вели Трапановски.

„Нашата цел е да освоиме што е можно повеќе бодови, ако е можно да ги победиме сите натпревари и да се пласираме во следната рунда. Фаворити сме, но во денешно време нема лесни противници“.

„Сметам дека ние како тим сме многу поквалитетни од Фарски острови. Теренот и времето нема да прават проблеми ако ние бидеме на вистинското ниво, ќе ги освоиме трите бода“, истакна за ФФМ младиот Трапановски.

Фудбалската федерација на Македонија информира дека Комисијата за натпревари на ФФМ на вчера одржаната седница донесе одлука за промена на термин во распоредот за 4. и 5. коло во Втора МФЛ како и за 3 (три) натпревари од Куп натпреварувањето во сениорска конкуренција а поради учество на турнир на аматерската репрезентацијата на Македонија во Република Србија во период од 12 до 19 септември 2024 година.

Во прилог подолу промените:

• 4 коло на Втора МФЛ  наместо на 14.09.2024 год  ќе се  одигра на 25.09.2024 год  од 15:00 час
• 5 коло на Втора МФЛ наместо на 21.09.2024 год  ќе се одигра на 22.09.2024  год   (недела) од 15.00 часот
• Куп натпреварите Победа-Гостивар, Башкими 1947-ФК Воска Спорт и Беласица-Македонија ЃП 1932  наместо на 18.09.2024 ќе се играат на  02.10.2024 (среда) во 14:00 час.