Денеска за Бадник, ден пред Христовото раѓање „Божик“ на градскиот плоштад во Кичево се одржа настан каде се пееја древни бадникарски песни, таканаречени каланди, од страна на византискиот хор при нашиот градски храм св. Петар и Павле – Кичево, во придружба на традиционални инструменти.

На настанот присуствуваа челниците од локалната градска самоуправа, многу гости, дечиња-коледарчиња, ведри родители, отци, сестри монахињи како и Архимандрит г.Доситеј.

Програмата ја водеше г-ѓа Софија Котевска, а се пееја најпознатите каланди. Прва изведба беше „Вечниот Бог“ – каде во неа се воспева Божјото слегување на Земјата, односно фактот на Христовото воплотување за спасение на целокупниот род човечки.

Втора каланда беше „Христос се раѓат“ – коледарска песна во која се опишува скромното доаѓање на Спасителот Христос, кој за да не научи на скромност и смирение, иако Цар и Бог, избра да се роди во бедната Витлеемска пештера од најскапоценото суштество што човекот можеше да му го принесе на Бога, а тоа е Пресвета Дева Марија Богородица.

Третата каланда во интерпретација на хорот се викаше „Три Цареви од Персија“ – исто така народна коледарска песна, која го опишува чудесното патување на тројцата Мудреци од Исток, кои водени од Ѕвездата водилка што се појавила на Небото, дошле да му се поклонат на новородениот Цар и да му ги принесат своите дарови: злато, ливан и смирна.

Четврта по ред беше композицијата „Сношти Христос ни се роди“ – во неа народот трогнат од љубовта Божја и од неискажливото Божјо смирение, а истовремено знаејќи дека само во Христа можеме да донесеме добри и многу златни плодови, колку што има ѕвезди на небото и лисја на гранките, стоејќи соблагодарност пред воплотениот Христос Бог, ни зборува за едноставното, смиреното и безгласно Негово доаѓање.

И последна композиција беше „Дева денес“ напишана од црковниот химнограф Свети Роман Слаткопевец во 7 век. Станува збор за навистина древна мелодија што се пеела ширум христијанскиот свет, а на овој настан беше изведена на албански јазик.

Со благослов од сестринството на манастир св.Богородица – Пречиста, на наше задоволство и радост, амбиентот на настанот ви го пренесуваме преку официјални фотографии.

Христос се роди!
За многу години!