Најдобриот светски тенисер, србинот Новак Ѓоковиќ потврди дека годинава нема да учествува на УС Опен. Ѓоковиќ на социјалните мрежи објави дека не патува во Њујорк бидејќи поради тоа што е невакциниран странец нема право да влезе на територијата на Соединетите Американски Држави.

Поради фактот што не бил вакциниран, не смеел да стапне на територијата на САД, а и покрај силната кампања да му се дозволи да настапува, единствената опција била да добие медицинско ослободување.

Администрацијата на претседателот Џозеф Бајден (или тој лично) беше единствената можност која можеше да му даде дозвола на српскиот играч, но тоа не се случи и турнирот во Њујорк остана без трикратен шампион.

Sadly, I will not be able to travel to NY this time for US Open. Thank you #NoleFam for your messages of love and support. ❤️ Good luck to my fellow players! I’ll keep in good shape and positive spirit and wait for an opportunity to compete again. 💪🏼 See you soon tennis world! 👋🏼

— Novak Djokovic (@DjokerNole) August 25, 2022

Ваквото сценарио би можело да се навести откако челниците на турнирот објавија изјава во која пишува дека ќе ги применуваат здравствените и безбедносните протоколи кои се утврдени за борба против коронавирусот.

Ѓоковиќ со тоа нема да има можност да се бори за 22. трофеј од најголемите турнири и да се обиде да го израмни рекордот кој моментално го држи Рафаел Надал.

Напорно тренираше и се подготвуваше во Белград и Црна Гора, но на крајот ќе ја пропушти целата турнеја низ Америка.

Моментално шестиот играч на АТП-листата ќе загуби 1.200 поени бидејќи пред 12 месеци стигна до финалето каде загуби од Данило Медведев. Тоа значи дека го чека нов пад и би можел да испадне од топ 10 во средината на септември.

Поради неиграњето меѓу српските претставници на „Флешинг Медоус“ остануваат Миомир Кецмановиќ, Филип Краиновиќ, Душан Лајовиќ, Ласло Ѓере и Александра Круниќ.

Следниот турнир на Новак е групната фаза од финалето на Дејвис купот на 13 септември.

УС Опен се одржува од 29 август до 11 септември и се игра за награден фонд од 60 милиони долари.

/rts.rs