Денес Рурална Коалиција во соработка со основното училиште “Кузман Јосифоски-Питу“- Кичево како и градинката “Олга Мицеска“- Кичево засади вкупно 60 дрвја од видот јавор, јасен и бреза. Одбрани беа токму овие дрвја затоа што испуштаат висок процент на кислород кој што треба да придонесе за намалување на загадувањето на територијата на општина Кичево.

– Акцијата да ја направиме токму со најмалите и учениците затоа што токму од тука започнува да се гради и развива еколошката свест и совест.

– Со денешната акција сакаме да испратиме порака дека оваа планета Земја е наша и дека друга немаме, а колку ќе ја одржуваме и чуваме зависи само од нас самите. Веќе важиме за еден од најзагадените градови во државата, а и на национално ниво состојбата не е ништо подобра, па токму ваквите мали чекори треба да поттикнат и поголеми акции кои што ќе ни го направат нашето место подобро за живеење – смета извршната директорка на Рурална Коалиција Лилјана Јоноски.

Директорката, па на основното училиште Кузман Јосифоски – Питу, Ирина Стојаноска, спомена дека ваквите акции, но и соработката помеѓу сите институции и локални чинители треба да бидат почести, но и долгорочни како би имале и долгорочен ефект.

Таа и додаде дека со учениците постојано се работи и на часовите секаде каде што се дозволува токму во наска на едукација на децата за заштитата на животната средина и јакнење на нивната еколошка свест

Директорот, пак на градинката Олга Мицеска, Садик Ахмети спомена дека токму градинките се местата од каде што треба да се почне да се гради и развива свеста кај децата за екологијата и за заштитата на животната средина затоа што само кога децата гледаат и се вклучуваат во активности разбираат дека е тоа важно и за нив и за нивните најблиски. Така ќе создаваме генерации кои што ќе ја имаат потребната едукација и свест да вложуваат во здрава и чиста животна средина.

Акцијата на садење дрвја е дел од промотивната кампања за чиста животна средина во локалната заедница, но и дел од мерките предвидени во Локалниот еколошки акциски план на општина Кичево кој што беше изработен со поддршка на Рурална Коалиција, а во рамките на проектот “Локални партнерства за локални климатски акции“.
Проектот “Локални партнерства за локални климатски акции“ го имплементира Рурална Коалиција како институционален грант, а во рамките на проектот „ГО и во акција за климатските промени“, спроведуван од Еко-свест во партнерство со Македонското здружение на млади правници – МЗМП и Организацијата за промовирање на природните вредности и луѓе – ЦНВП Македонија.

Оваа објава е создадена со финансиска поддршка на Европската Унија, ко-финансирана од Шведска.

Галерија од денешниот настан: