Предмалку заврши прекрасниот концерт во организација на КУД „Нико Пусоски“ од Кичево, кој беше реализиран по повод доаѓање на гостите од Власотинце, Република Србија, каде една од помалите групи на кичевското културно уметничко друштво беше исто така гостин летово на официјалниот гала настан „Власотинско културно лето 2024“

Концертот го отворија најмладите мали но големи надежи со орото „Македонците од Пустец“, потоа настапија гостите од КУД „Црниловиќ“ од Република Србија со „Игри од Власотинци“, додека како трети настапија домаќините со игри од Егејска Македонија.

Нашите играорци настапија исто така и со фрагменти од „Бркање на чумата“, „Густа ми магла паднала“, „Надигруванка“. Гостинката Нина Валчиќ се претстави со песната „гнездо орлово“, додека на сцената го видовме и оркестарот на КУД „Нико Пусоски“ кои во придружба со домашното вокално трио се претставија со „Ајде поминувам, заминувам“ и „Мори чупи костурчанки“, за на крај домаќините за прв пат да изведат фрагменти од сплетот „Моме Митро“.

Во продолжение галерија преку нашиот објектив, додека сите кои сакаат да си ги имаат за себе овие прекрасни фотографии, тоа можат да го направат од денес и во следните 7 дена преку линкот ТУКА, со почит вашите Порта.мк, број 1 онлајн медиум во регионот!

Деновиве во просториите на ЈЗУ „Општа Болница – Кичево“, во склоп на лабараторијата на болницата започна со работа нов имунолошки апарат. Истиот опфаќа анализа на „хормони, тумор маркери, Beta HCG, D-Dimeri“ итн.

За прв пат во нашиот град ќе ни се овозможат и ќе им станат лесно достапни овие потребни анализи на нашите сограѓани. Во периодот од 16-ти до 18-ти октомври сопствениците на апаратот извршија обука на нашите вработени, биолози и лабараторски техничари, за Порта.мк истакна директорката на ЈЗУ „Општа Болница“, Д-р Маја Цветановска-Трајкоска.

Меѓу присутните на обука беа гости од Тајланд, директно од фирмата производител на апаратот. Имунолошкиот анализатор „AutoLUMO 1860“ ќе ни овозможи современа лабараториска дијагностика во нашата болница.

Имунолошкиот анализатор „AutoLUMO 1860“

Инаку за информација пред нешто повеќе од еден месец благодарение на новото раководство на чело со директорката Д-р Маја Цветановска-Трајкоска, со заложби на Министерството за здравство но и Министерството за социјална политика, демографија и млади, во оваа здравствена установа започна со работа „Стручна комисија за давање наод, оцена и мислење за потребата од помош и нега од друго лице“ повеќе за таа вест ТУКА, и за тоа исто како и за новоста денес кичевчани чекаа со денови и патуваа во други градови

Вработени на ЈЗУ „Општа Болница“ – Кичево и гости од Тајланд

Во саботата, на 2 ноември 2024 година, домот на култура „Кочо Рацин“ во Кичево се претвори во вистински храм на рок музиката. Повеќе од 350 гости ги наполнија просториите, подготвени да уживаат во второто издание на „Enigma Rock Night “, вечер која и оваа година ги собра најдобрите локални бендови и ги раздрма љубителите на рокот со автентични звуци и незапирлива енергија.

Настанот започна во 20:00 часот и траеше повеќе од пет часа, за време на кои публиката имаше можност да ужива во спектакуларните настапи на шест бенда кои ја покажаа својата умешност и посветеност кон рок музиката. Fire Phoenix, Half God, Future Band, Black Velvet, Steam и Plum се погрижија за вистинска рок сензација, додека динамичните рифови и заразните ритми ја исполнија вечерта со свежа и возбудлива атмосфера.

Вечерта помина како совршен микс на носталгија и модерна енергија. Бендовите се погрижија да донесат звуци кои ги вратија присутните назад во времето, но истовремено им подарија нова димензија на искуството – симбол на нивната љубов кон музиката и рок културата. Преку неуморните интерпретации, публиката можеше да ја почувствува силната посветеност на артистите, кои со својата страст создадоа вистински незаборавно доживување.

Организаторите на Enigma Rock Night  изразија надеж дека наредната година уште повеќе бендови, кои низ годините биле дел од рок сцената на Кичево, ќе се приклучат на настанот, како и поддржувачки бендови од соседните градови. Вечерта покажа дека Кичево има силна и лојална база на љубители на рокот кои се подготвени да го прослават овој жанр и да дадат поддршка на локалните таленти.

Второто издание на  Enigma Rock Night  беше повеќе од обичен концерт – тоа беше настан што ги поврза музичарите и љубителите на рокот, потсетувајќи ги на моќта на музиката како средство за зближување. Оваа вечер ќе остане врежана во сеќавањето на сите присутни како ноќ кога Кичево гласно го чествуваше рокот.

Погледнете ја галеријата за porta.mk низ објективот на Ненад Милошески