Фудбалската федерација на Македонија (ФФМ) денес го доби петтиот претседател во историјата и тоа во името на Муамед Сејдини, познатиот спортски работник по потекло од Кичево.

Најуспешниот претседател во историјата на македонскиот фудбал денес доби четиригодишен мандат.

УЕФА и ФИФА го поздравија изборот на Муамед Сејдини.

Македонскиот фудбал оди напред, така што на денешното собрание сите присутни делегати вкупно 52 во хотел „Александар Палас“ гласаа за нов мандат од 2021 до 2025.

Интегралниот текст на Сејдини ви го пренесуваме во целост:

Драги пријатели и соработници,

Најнапред сакам да ја искажам мојата благодарност до сите Вас за укажаната довербата.

Честа да се биде претседател на Фудбалската федерација на Македонија е голема. Вашата поддршка ме обврзува да продолжам да го давам својот максимум за развој на македонскиот фудбал.

Благодарност до претседателот на ФИФА Џани Инфантино за убавите зборови на поддршка. Тоа е голема работа за нас и ќе се трудиме да бидеме во чекор со светските фудбалски трендови кои вие ги применувате.

Благодарност до УЕФА за извонредната соработка. Среќни сме што имаме одличен партнер во УЕФА на чело со нашиот драг пријател, Александар Чеферин.

Годината 2020. на фудбалски план ќе ја паметиме по нашиот најголем успех и пласманот на нашето прво Европско првенство. Потврдивме дека кога се работи искрено и мотивирано резултатите не изостануваат.

Во тој правец ќе продолжиме и во следниот период. На најдобрата репрезентација им ги овозможуваме најдобрите услови за работа, а поголем мотив за нив од настап на Европското првенство мислам дека не постои. Им посакувам многу успех во Букурешт и Амстердам и дај Боже одново да се радуваме на големи резултати.

Поддршка, техничка, финансиска и логистичка, како и досега ќе добијат и сите други национални селекции. Тоа е нашата репрезентативна база и ќе продолжиме да ги надградуваме младинските селекции и Академијата на ФФМ.

Фудбалската федерација на Македонија секогаш ќе ја помага својата база. А, Општинските фудбалски Сојузи се нераскинлив дел од нашето семејство. Ве повикувам да разговарате, да се борите, да работите заеднички.

Ги повикувам и охрабрувам клубовите од Македонската лига. Вклучете се активно во организацијата на натпреварувањата. Како и досега, секогаш ќе ја имате мојата и поддршката на федерацијата за формирање на Ваше здружение за организација на натпреварите.

За тој чекор, ниту некогаш сум бил противник, ниту ќе бидам. Тоа е натпреварување на клубовите и доколку сметате дека треба да го организирате преку свое здружение ја имате мојата целосна поддршка. ФФМ ќе помогне во таа насока на начин на кој заеднички ќе одлучиме.

Во најтешката година од секој аспект, успеавме самостојно да го организираме натпреварувањето во македонските лиги. Сите клубови беа ослободени од трошоци за официјални лица, а во младинските, женските и футсал лигите, федерацијата ги покриваше и другите трошоци.

Согласно стратешкиот план на нашата федерација ќе продолжиме во таа насока. Со поддршка од УЕФА и хет-трик програмата за развој верувам дека уште повеќе ќе ја засилиме соработката со институциите, сѐ со цел развој на фудбалската инфраструктура која ја има клучната улога во развојот на фудбалот.

Драги пријатели,

Додека јас сум претседател на оваа федерација, чесноста и отвореноста ќе бидат особини кои нѐ красат. Вратата на Фудбалската федерација секогаш ќе ви биде отворена.

Дајте Ваш придонес да бидеме горди на репрезентацијата, да бидеме горди на младите селекции, да бидеме горди на нашите клубови, нашите тренери, судии, фудбалски великани.

Денеска е големиот христијански празник – Прочка.

Јас сум муслиман, но и во нашата вера, откако ќе прости, човекот ќе има кроткост, трпение, смирение и човекољубие. Простете ако грешев.

Ви благодарам, ви посакувам здравје и успех.