Центарот за управување со кризи (ЦУК) денеска информира дека како резултат на поројниот дожд, во Кичево дошло до излевање на реката Темница, при што биле поплавени околу 50 куќи на улицата „Прилепска“.Во текот на ноќта биле евакуирани една жена и едно дете, а за настанатата сосотојба известени биле сите надлежни институции.

Врнежите од дожд кои беа најинтензивни во последните 24 часа, предизвикаа излевање на реката Треска во регионот од селата Челопеци, Атишта, Лисичани и Пласница и поплавени се над 500 хектари ораници и ливади. Количините на вода беа толку големи што од 1982 година не сме имале прилика да ја видиме Треска толку полноводна. Исто така поплавен е патот за село Лисичани, така што во еден негов дел сообраќајот не може да се одвива, бидејќи водениот талог е многу висок. Исто така и селското училиште е опколено со големи количества на вода, но сепак поплавата не ја зафати и самата училишна зграда. За среќа врнежите од дожд престанаа и треба да очекуваме наскоро Треска да почне да се повлекува, а направени штети допрва да се утврдуваат – информира претседателот на МЗ Лисичани, Кемаил Сами.

Како што дознава нашиот портал поплавени се делови од долниот дел на населба Карпош или потточно “Кај Марвената”, делови од “Ужичка”, индустриската зона и делови од населба “Иванидол” итн…

Дел текст: Зоран Антоски