Мобилни уреди Технологија

Galaxy S10 ќе ја покори конкуренцијата: Интензивно се работи на најмоќниот телефон на Самсунг

Екран со дијагонала од дури 6,7 инчи, четири камери на задната и две камери на предната страна, поддршка за 5G – тоа ќе бидат опциите на најмоќниот модел на Galaxy S10.

Идната година јужнокорејски Самсунг ќе ја претстави јубилејната 10-та генерација на својот најголем адут на пазарот на паметните телефони.

Наводно Самсунг идната година ќе претстави дури четири модели од серијата Galaxy S10. Два модели би требало да имаат екран со дијагонала од 5,8 инчи. Најевтиниот модел би требало да му биде конкуренција на iPhone XR, а со исти димензии на екран, но подобри перформанси би бил класичниот Galaxy S10. Покрај тоа, се очекува да биде претставен и Galaxy S10+ кој би имал екран со дијагонала од 6,4 инчи и од 3 до 5 камери распоредени на предната и задната страна.

Покрај овие модели, The Wall Street Journal пренесува дека Самсунг подготвува и јубилеен модел за десетгодишнината на Galaxy S серијата и ако овие информации се вистинити, тогаш тоа би требало да биде најмоќниот телефон на јужнокорејската компанија досега.

Телефонот се развива под кодното име “Beyond X” и би требало да има екран со дијагонала од 6,7 инчи и дури шест камери – четири на задната страна и две на предната страна. Фотографските можности на најмоќниот Galaxy S10 ќе бидат од најголема важност затоа што, Самсунг ќе сака со овој модел да ја врати титулата најдобар „мобилен фотоапарат“.

Покрај тоа, најмоќната верзија на Galaxy S10 би требало да има и поддршка за 5G, па тоа ќе биде еден од првите такви телефони на пазарот.

Извор: Tocka.com.mk