Традицијата за време на Богојавление (Водици) во Кичево да се положува крст во реката Темница, датира од пред повеќе од еден век. Вистински ритуал било на овој ден да се присуствува на овој свет настан, кога изгледало како целиот народ од овој крај да е собран крај реката.

Една фотографија стара 82 години е најдобра потврда дека во Кичево водичарските традиции отсекогаш се негувале. На сликата е снимен моментот кога крстот треба да се положи во студените води на Темница, а еден од кандидатите за вадење на крстот бил Стојмир Софрониоски-Цоле, од соседната населба Под Варош. Иако мал по раст, Стојмир бил човек со големо срце. Тој целиот работен век го минал во локалната кланица, каде што секојдневно, и лете и зиме, патувал со велосипед.
И годинава кичевчани беа дел од вековната традиција, за што во иднина ќе сведочат новите генерации. 

Извор: Зоран Антоски / Нова Македонија