Интензивните врнежи од снег во изминатите два дена  им создадоа многу проблеми на жителите во кичевско-бродскиот регион. Поради снегот и гранките кои се надвиснаа на нисконапонската мрежа, триесетина села во регионот се уште се без струја, а патиштата не се проодни до дваесетина села.

– Проблемите кој се создадоа по интензивните врнежи од снег, се уште се присутни во нашиот регион. Така, поради паднати електрични столбови и скинати електрични водови, без електрично напојување се селата Челопеци, Цер, Црско, Староец, Карбуница, Зајас, Вранештица, Лавчани, Јагол, Јагол Доленци, Атишта, Малкоец, Душогубица, Иванчишта, Ехловец и сите села во Рабетинска Река. Екипи на ЕВН се на терен, но поради многуте дефекти кои се појавија по овие снегови, тие тешко можат да се отстранат за толку кратко време. Покрај проблемите со електричното напојување патиштата се уште не се проодни до селата Малкоец, Душогубица, Иванчишта, Карбуница, Кнежино, Патеец, Рабетино Дупјани и Козичино. Екипи на Јавното комунално претпријатие и задолжени за одржување на патиштата во зимски услови се наоѓаат на терен, и се очекува наскоро сите патишта во општината да бидат проодни -информираа од Подрачното одделение на Дирекцијата за заштита и спасување во Кичево.

Со слични проблеми се соочува и Бродскиот регион, така што во моментов без струја се наоѓаат сите села по течението на реката Треска, односно Рамне, Заград, Воче, Лупште, Растеш, Близанско, Г.и Д. Манастирец и други. Истиот проблем со патиштата го следи и овој регион.

– Во нашиот регион веќе 42 часа немаме електрично напојување. Се уште екипи на ЕВН не се пристигнати и не знаеме кога ќе ги отстранат овие дефекти. Најлошо е што храната ставена во фрижидер, поради немање на струја почна да се расипува – рече Митко Никодиноски од село Рамне.

Жител на селото Зркле не информира дека под селото има паднато електричен столб од ниско напонскатамрежа кој дополнително треба да се санира и селото дури потоа да добие електрична струја. Инаку, жителите од овој регион се жалат дека електричните столбови се стари повеќе од 50 години и поради тоа полесно се кршат и паѓаат.

– Безмалку два дена нашето село е без електрична струја а патот е непрооден единствено со теренско возило. Под селото има скршено електричен столб и не знаеме кога екипи на ЕВН ќе дојдат и ќе го одстранат овој дефект – рече Пеце Трајкоски од село Зркле.

Извор: Зоран Антоски / Нова Македонија