Традиционално граѓаните на Кичево за пречекот на Старата нова година во сите градски населби палат василичарски огнови. Крај огновите се собираат голем број граѓани, кои за оваа прилика подготвуваат домашни колбаси и свинско месо, а тука е и неизбежната топла ракија, и сето тоа зачинето со музика од многуте оркестри од градот.

Во повеќето населби се бираат и василичарски кумови, кои го организираат пречекот на старата Нова година и ја преземаат улогата на домаќини, а притоа се грижат и да има доволно количество мезе , топла ракија и полноќна пита со паричка.

– Во нашата населба повеќе од две децении се избираат василичарски кумови. На почетокот тоа ни изгледаше како проба, но од година во година овој пречек добиваше се поорганизирана форма, и сите како едвај да го чекавме пречекот на Старата нова година и убавата дружба во таа ноќ, последна по Јулијанскиот календар. Секоја година по едно семејство во нашата населба го презема кумството, или пак, повеќе семејства од една фамилија ја преземаат оваа улога. Кумот ќе се погрижи за да има доволно топла ракија, мезе и туршија и на самиот пречек на Старата нова година, своите соседи и пријатели да ги послужи со тазе подготвена пита со паричка. Годинава и времето е на наша страна, и тоа е причина повеќе за да бидеме собрани во голем број и да направиме незаборавен пречек – рече Саша Дукоски, жител од населбата Коњски Ливади.

И додека го водевме разговорот, оркестарот непрекинато ги веселеше гостите, а тие несебично му возвраќаа со игра и песна.

Извор: Зоран Антоски / Нова Македонија