Пред нас се брзи и големи промени на временската состојба, поточно најпрвин ни следува студен воздух од север кој го очекуваме уште од вечерва, повторно голем пораст на температурите очекуваме особено за време на викендот, секако сето ова многу лошо ќе влијае врз поголем дел од граѓаните па така кај повеќето граѓани, особено кај метеопатите можна е главоболка како и болка во коските и на местата од старите рани, повремена нервоза и несоница како и тежина во главата и телото.

Инаку утре (среда) од југ во нашата држава ќе навлезе влажен бран кој ќе услови повремени врнежи и тоа од дожд на ниските и снег на повисоките и планинските места, ќе дува и умерен до засилен ветер од северен правец кој ќе услови значително намалување на загаденоста во воздухот.

Снежната граница има услови на некои места, особено на запад и на север да се спушти и под 1000 м.н.в.

Врнежите ќе бидат со слаб до умерен, понекаде и со умерен интензитет па локално се очекува да наврнат околу 10 до 15 л/м2 воден талог.

Максималните дневни температури на воздухот ќе бидат за 5 до 7 степени пониски од денешните и ќе се искачуваат во интервалот од 2 до 11 степени.

Веќе од четврток следува период на стабилно и суво време па така наутро понекаде температурите ќе се спуштат под нулата, максималните дневни пак повторно ќе бидат во позначително покачување и за време на викендот ќе бидат повторно над просекот за овој дел од годината и ќе се искачуваат во интервалот од 8 до 15 степени.

По одделни котлини повторно ќе растат условите за појава на магла и на ниска облачност.

НАПОМЕНА: Со оглед на очекуваната состојба со времето утре (среда), на возачите им препорачуваме да бидат крајно претпазливи поради очекуваните врнежи, особено доколку минуваат низ планинските превои.

Текст: Славчо Попоски
1tv.mk / BMJ Мedia Group