Оваа сабота 01.06.2019 се одржа третата еко акција во Крушино.

Се започна како резултат на револтот кој се појави кај мене кога видов во каква состојба е Крушино на 2ри мај, ден после прославата на 1ви Мај.

На фејсбук повикав на акција и мала група на големи луѓе се пријави со добра воља да чистиме заедно.

На втората акција веќе се собравме голема група на луѓе, меѓу кои и учениците на О.У. Владимир Полежиноски Бато, кои особено ме израдуваа, бидејќи видов дека млади луѓе покажуваат свесност и грижа за животната средина.

Исто беше и на денешната трета по ред акција, повторно имаше поголема група на граѓани, а овој пат засилување ни беа учениците од О.У. Санде Штерјоски.

На 22.06.2019, во сабота, со почеток во 10:00 часот е закажана уште една еко акција, која планираме да биде и последна акција во Крушино.

Затоа апелираме на масовно присуство на луѓе, се со цел Крушино што поскоро да ја добие убавината која ја изгуби низ годините на запоставеност и заборавеност од надлежните и што поскоро да стане функционално повеќе од досега, за сите нас вљубеници во спортот, природата и здравиот начин на живот, изјавуваат младите кичевчани, воедно иницијатори и организатори на акциите.

Исто така потребни се материјални и финансиски средства за реализација на се што имаме како цел да поправиме и замисла да подобриме, а моментално е во лоша и скоро неупотреблива состојба, затоа ги повикуваме сите луѓе со визија за подобро утре, сите физички и правни лица кои сметаат дека на било кој начин може да придонесат, да не контактираат на e-mail адресата е[email protected] или лично Ангела Мојсоска.

Благодарност до сите луѓе кои се приклучија на акциите и направија мојата желба да стане реално остварлива, се радувам за сите луѓе кои ги запознав на акциите, бидејќи сите тие се прекрасни луѓе со визија, со добра воља, полни со позитивна енергија, ентузијазам, со тимски дух и со непотрошлива енергија, луѓе со кои ја делиме истата желба и заедно се движиме кон иста цел.

Откако ќе завршиме со акциите во Крушино планираме да дејствуваме и на други локации во Кичево и околината, а кон крајот на летото…изненадување за сите.